Desishonnan di djárason 30 di ougùstùs 2023

Desishonnan relashoná spesífikamente ku asuntunan di pais riba nivel nashonal di djárason, 30 di ougùstùs 2023:

1. Proposishon pa planifikashon di komberashonnan ku ministerionan i e ministernan konserní riba Plan Nashonal di Rekuperashon, fechá 23 di ougùstùs 2023. (Minister di Desaroyo Ekonómiko)

 Konseho di Minister a tuma nota di e plan di Minister di Desaroyo Ekonómiko pa hiba kombersashonnan ku ministerionan i kada minister konserní riba e Plan Nashonal di Rekuperashon.

2. Konseho di dia 11 di ougùstùs 2023 tokante e petishon pa kambio di presupuesto di Ministerio di Enseñansa, Siensia, Kultura i Deporte (OWCS) pa pagonan relashoná ku Metro Ethernet, e proyekto “Conscious Discipline” i seguro di skolnan pa Uitvoeringsorganisatie Onderwijs en Wetenschap (UOW). (Minister di Enseñansa, Siensia, Kultura i Deporte)

Konseho di Minister ta akordá e desishon ku ya a keda tumá pa Rijksministerraad riba 18 di ougùstùs 2023. E desishon akí ta tokante e petishon di Ministerio di Enseñansa, Siensia, Kultura i Deporte (OWCS) pa kambia nan presupuesto. Esaki relashoná ku pagonan ku mester hasi pa Metro Ethernet, e proyekto “Conscious Discipline” i seguro di skolnan pa Uitvoeringsorganisatie Onderwijs en Wetenschap (UOW). Esaki ta sosodé konforme e reglanan stipulá den artíkulo 47, insiso tres, di Landsverordening comptabiliteit 2010. Esaki ta basá riba konseho di Direktor di Sektor di Maneho Finansiero i Maneho di Presupuesto di dia 11 di ougùstùs 2023.

3. Plan di dia 28 di ougùstùs 2023 relashoná ku konseho tokante e Grupo di Trabou “Kostenverlaging Geneesmiddelen”. (Ministerio di Salubridat, Medio Ambiente i Naturalesa)

Konseho di Minister ta di akuerdo ku e siguiente normanan pa ku e maneho riba redukshon di gastunan di medisina:

• Lo sigui e rekomendashonnan 01 te ku 12 manera deskribí den e konseho di dia 28 di ougùstùs 2023 di e Inspektor-General suplente di e Servisio di Inspekshon di Salubridat Públiko. Sinembargo, mester tene kuenta ku e límite di entrada di hende ku tin entrada abou na momentu di redukshon di e kantidat di medisina disponibel (punto di konseho 03 i 05);
• Progreso i implementashon di e proposishonnan akí lo wòrdu kontrolá pa e Grupo di Trabou “Kostenverlaging Geneesmiddelen”.

Tur esaki ta basá riba proposishon di dia 28 di ougùstùs 2023 di Minister di Salubridat, Medio Ambiente i Naturalesa, i e konseho di Inspektor-General suplente di Inspekshon di Salubridat Públiko di dia 28 di ougùstùs 2023.

4. Plan di 24 di ougùstùs 2023 tokante un estudio pa formashon komo dokter di kas na Kòrsou. (Ministerio di Salubridat, Medio Ambiente i Naturalesa)

Konseho di Minister ta di akuerdo ku e dekreto nashonal den konsepto pa krea un Komishon “Opzet en Implementatie Huisartsenopleiding” na Kòrsou. E komishon akí tin komo tarea pa mas pronto posibel bini ku plannan tokante un estudio pa formashon komo dokter di kas na Kòrsou. E plannan akí mester wòrdu presentá na Konseho di Minister pa aprobashon i implementashon. E proposishon akí ta basá riba e plan di 24 di ougùstùs 2023 di Minister di Salubridat, Medio Ambiente i Naturalesa.

Konseho di Minister alabes ta di akuerdo pa manda e dekreto nashonal akí pa Gobernador pa firma. Sinembargo, mester agregá un representante di Ministerio di Enseñansa, Siensia, Kultura i Deporte na e komishon, manera menshoná den artíkulo 3 di e dekreto nashonal den konsepto. Despues ku a hasi e kambio akí, por manda e dektreto nashonal pa Gobernador pa firma.

MAS NOTISIA