Servisio di Voogdijraad - Informashon tokante Gobièrnu di Kòrsou

Ministerio di Hustisia

Servisio di Voogdijraad

Mediashon den kontakto entre mayor i yu

Normalmente mayornan ta palabrá ku otro tokante di kontakto ku nan yunan òf e areglo pa bishita nan yunan. Tin biaha tin konflikto entre e mayornan tokante e tópiko aki. Ora mayornan pleita hopi ku otro nan por hasi daño na e yunan. Si e mayornan no por resolvé e problemanan nan por aserká Voogdijraad pa mediashon. Voogdijraad lo sinta na mesa ku e mayornan pa yega na un areglo huntu ku nan. Si no por yega na un areglo hues lo tuma desishon, posiblemente despues ku Voogdijraad a hasi un investigashon.

Investigashon den protekshon di mucha

Si un famia tin problema, nan por pidi nan ret sosial òf instansianan profeshonal pa yuda nan. Tin biaha e kondishonnan di un mucha i su famia ta asina problemátiko ku e ayudo aki no ta sufisiente (mas). Den e kaso aki CMK por pidi Voogdijraad pa hasi un investigashon i por pidi hues pa imponé un medida pa protehá e mucha. Esei lo sosodé si despues di un investigashon a konstatá ku e mucha mester di ayudo obligatorio. E medida mas komun ta ku e mucha ta wòrdu poné bou di supervishon. Den e kaso aki ta nombra un tutor pa e famia. E famia mester akseptá e ayudo aki.

Investigashon di i konseho tokante di outoridat i asuntu di kontakto

Voogdijraad ta investigá i konsehá den asuntu di outoridat i kontakto, riba petishon di hues. Esei ta e kaso ora mayornan ta separá i nan no ta yega na palabrashon tokante e yunan. Lei ta stipulá ku mayornan ku ta separá ta retené nan outoridat di mayor. Ademas, nan tin e derecho di tin kontakto ku na yunan konforme lei. Si e mayornan no por yega na un akuerdo tokante di e kontakto ku nan yunan i e residensia di e yunan, hues mester disidí tokante di e asuntunan aki. Hues por pidi Voogdijraad pa investigá e situashon i konseh’é tokante di kiko ta mihó pa e yunan.  Si tin preokupashon grandi pa un mucha, Voogdijraad por disidí pa entamá un investigashon di protekshon.

Asuntu di outoridat i outoridat temporal

Tur persona menor di edat na Kòrsou mester ta bou di outoridat. Si e outoridat no ta determiná òf no por ehersé’ é, Voogdijraad mester regl’é, ehèmpelnan ta:

  1. outoridat riba un mucha ora su mama òf tata a fayesé;
  2. outoridat ora e mama ta menor di edat;
  3. outoridat ora un di e mayornan ta establesé su mes den eksterior pa un periodo, manera pa un estudio òf asuntunan médiko i e ta laga e yu menor di edat serka un otro persona;
  4. outoridat ora bo yu ke biba un periodo na Hulanda, Aruba, St. Maarten òf BES. Un prosedura spesial ta bálido pa estadia temporal na Hulanda pues bo mester entregá un petishon na Voogdijraad na tempu pa entamá e prosedura. Pa mas informashon bo por tuma kontakto ku Voogdijraad. Despues ku  Voogdijraad a investigá e kaso, hues lo disidí riba e outoridat.

Adopshon

Mayornan ku ke inkluí un mucha di eksterior den nan famia òf mayornan ku ke adoptá muchanan por akudí na Voogdijraad. Riba petishon di e mayor(nan) Voogdijraad ta hasi investigashon pa por haña bista riba e kapasidat di e mayor(nan) ku ke adoptá un mucha. Interes di e mucha ku lo inkluí den un famia ta sentral. Mester risibí pèrmit for di e mayor(nan) biológiko. Bo por tuma kontakto ku Voogdijraad pa esei. Voogdijraad lo investigá pa determiná si e famia ta kapasitá pa adoptá e mucha. Hues ta tuma desishon riba e adopshon.

Realisashon i pago di alimentashon pa mucha

Si bo tin pregunta tokante di alimentashon pa mucha, bo por akudí na Voogdijraad. Voogdijraad lo konsehá i sostené bo den bo aplikashon pa alimentashon pa bo yunan. Den e kasa aki Voogdijraad lo studia e situashon finansiero di e mama i tata di e yunan i lo indiká kua suma di alimentashon ta sufisiente. Hues lo disidí finalmente kua suma di alimentashon mester paga. Den hopi kaso Voogdijraad por kobra alimentashon for di e persona ku mester paga esaki i sòru pa esun ku tin derecho riba e alimentashon risibí esaki.

Investigashon penal menornan di edat 12-18 aña

Si ta traha un prosès verbal kontra un mucha pa un echo kastigabel òf si e mucha ta den protekshon di gobièrnu, Ministerio Públiko lo informá  Voogdijraad riba esei. Nos ta hasi investigashon pa informá fiskal i hues tokante di e hóben i su situashon (familiar). For di un perspektiva pedagógiko, Voogdijraad ta konsehá fiskal i hues tokante di posibel kastigu i ayudo sosial ku ta kuadra ku e echo kastigabel. Si tin hopi preokupashon Voogdijraad por disidí pa entamá un investigashon di protekshon.

Pa e echo kastigabel aki e hóben por haña un kastigu, medida òf un kombinashon. Un kastigu por ta un but, un kastigu di trabou òf detenshon hubenil. Un medida por ta un PIJ medida. Por imponé kondishon tambe den kual e hóben mester haña guia for di Jeugdreclassering.