Adaptashon den maneho di Covid-19 pa skolnan avansá - Informashon tokante Gobièrnu di Kòrsou Bo opinion

Notisia

Adaptashon den maneho di Covid-19 pa skolnan avansá

Geplaatst op 29 December 2020 dor di Ministerio Enseñansa, Siensia, Kultura & Deporte

WILLEMSTAD – Alumnonan di enseñansa avansá, por sigui lès di forma físiko atrobe, for di dia 5 di yanüari 2021, sin ku mester parti e klasnan pa gruponan mas chikitu. Esaki tambe ta trata lèsnan di práktika. Ministerio di Enseñansa, Siensia, Kultura i Deporte (OWCS) a informá direktivanan di skol di tur e medidanan mará na e desishon akí, di forma ku tur skol por informá dosente, mayor i alumno.

Pa por hasi esaki, e skolnan si mester tene kuenta ku algun kondishon:

  • Ta trata pa usa e mesun struktura ku ta usa durante prueba i èksamen, ora ta organisá stul i mesa den klas;
  • Lèsnan di edukashon físiko ta tuma lugá nòrmal, pero ta evitá e aktividatnan di aserkamentu intensivo i kontakto físiko;
  • Personal di skol i dosentenan mester mantené distansiamentu sosial di 2 meter;
  • Entre dosente/personal di skol i alumnonan, mester mantené distansiamentu sosial;
  • Entre alumnonan di skolnan avansá no mester tene distansiamentu sosial;
  • Alumnonan mester sinta mas tantu posibel na e mesun lugá i si ta posibel banda di e alumno ku mayoria biaha nan ta sosialisá kuné den pousa;
  • Mester evitá aglomerashon den kurá di skol i tambe rondó di skolnan;
  • Ta trata pa alumnonan no mester kambia di klas òf hasi esaki ménos posibel; 
  • Ta preferá pa dosentenan kambia di klas ora ta nesesario;
  • Klasnan ta haña pousa tras di otro i no pareu. Preferibel no laga alumnonan di diferente grupo hasi uso di e plenchi pareu; 
  • Traha un skema kaminda ta strukturá uso di e plenchi di skol;
  • Ta sòru pa ventilashon regular di lokal i espasionan será.

Skolnan por kontinuá ku e repartishon di klasnan durante e pandemia di Covid-19, den kaso ku direktiva di skol òf e skol ta di opinion ku e repartishon tin efekto positivo i tantu e skol komo alumnonan ta logrando e metanan si enseñansa. Huntu ku e Direktiva di skol, e skol mester por demonstrá esaki i alabes definí indikadónan pa evaluá e desishon regularmente. Skolnan por duna enseñansa di forma alternativo òf den forma di pakete di tarea, na alumnonan ku ta na kas pa motibu di karentena òf isolashon.

Ministerio di ESKD ta informá ku tur programa di skol (PTO/PTA) ta keda bálido. Na momentu di kambio semper mester di aprobashon di Inspekshon di Enseñansa. Pa kualke pregunta adishonal por tuma kontakto direktamente ku e skolnan i/òf direktivanan di e skol. Si ta nesesario por manda un mail pa Ministerio di ESKD na: OWCS.Communicatie@gobiernu.cw.

 

Ministerio konserní