Publiká riba 28 Yüni 2020
WILLEMSTAD – For di prinsipio ku Gobièrnu di Kòrsou a aserká Gobièrnu di Hulanda pa risibí sosten finansiero, Hulanda a duna di konosé ku esaki lo ta mará na algun kondishon. Den e kuadro aki Hulanda a indiká na Kòrsou ku mester buska formanan struktural pa mehorá situashon finansiero di pais. Esaki entre otro dor di kòrta den gastunan di personal (25% riba e pakete total di kondishonnan laboral di funshonarionan haltu den aparato públiko i 12.5% riba e pakete total di kondishonnan laboral di tur empleado públiko) i den entrada di gruponan vulnerabel (entrega di 20% di e salario supsidiá ku a risibí atraves di e Fondo di Sosten). Segun Hulanda no ta trata aki di ekonomisashon, pero di un reforma esensial ku mester tuma lugá pa yega na rekuperashon sosial-ekonómiko i transformashon duradero di pais. Ounke ku Hulanda ta hustifiká e rason di lokual e ta proponé di e forma aki, Gobièrnu di Kòrsou ta keda mira e kondishonnan aki komo medidanan severo pa ekonomisá en bes di solushonnan duradero den kuadro di reforma.
Gobièrnu di Kòrsou no por ta mas di akuerdo ku Hulanda ku mester sigui implementá e reformanan nesesario pa yuda lanta nos ekonomia di nobo. Sinembargo, Gobièrnu ta di opinion si ku esaki ta solamente posibel a base di un aserkamentu hustu di e tipo di kondishonnan ku ta eksihí Kòrsou pa kumpli kuné. E pensamentu aki ta basá riba e realidat penoso ku Kòrsou ta pasando den dje aktualmente, esta ku un ekonomia ku ya pa hopi aña ta stagná awor a haña un gòlpi aun mas grandi pa motibu di e medidanan ku mester a tuma pa salbaguardiá salubridat en general di komunidat durante ‘lockdown’ di COVID-19. Esaki a resultá inevitablemente den un paro kompleto di komèrsio den prinsipalmente e sektor turístiko i di horeca, kaminda hopi negoshi i empresarionan inidividual, pero tambe un kantidat grandi di empleado a pèrdè nan entrada. Konsekuentemente, e nesesidat grandi di komunidat pa risibí sosten di Gobièrnu a bin ta krese dia pa dia mas tantu, pero e fondonan di Gobièrnu alabes a bai sistemátikamente atrás ya ku e grupo en kuestion no por sigui kumpli ku su deber di paga belasten. I hustamente pa e motibu aki Gobièrnu no tabatin otro opshon ku pidi Hulanda sosten finansiero i finalmente tambe aseptá e kondishonnan mará na esaki.
Gobièrnu di Kòrsou ta agradesido ku Hulanda a duna oido pa yuda ku e finansa nesesario. Loke Gobièrnu si ta lamentá ta e echo ku no a duna espasio pa dialogá na momentu ku a presentá e kondishonnan. Apesar ku ta importante pa por ehèmpel krea un aparato públiko efisiente i kapasitá, e kondishonnan ku Hulanda a proponé por resultá den konsekuensianan negativo aun mas grandi pa nos ekonomia. Nan ta para liña rekta tambe kontra e konseho di IMF pa bin ku solushonnan integral riba término largu. Introdukshon sin mas di e kondishonnan manera presentá pa Hulanda, sin duda lo sigui empeorá nos situashon finansiero.
No opstante esaki Gobièrnu di Kòrsou lo sigui traha duru na implementashon di e plan di rekuperashon na bienestar di komunidat di Kòrsou i ta determiná pa realisá un mihó porvenir pa nos tur.
