Awe ta Dia Internashonal di Laba Man 2021 - Informashon tokante Gobièrnu di Kòrsou Bo opinion

Notisia

Awe ta Dia Internashonal di Laba Man 2021

Geplaatst op 15 October 2021 dor di Ministerio Salubridat Públiko, Medio Ambiente i Naturalesa

Willemstad – Dia 15 di òktober ta Dia Internashonal di Laba Man. Laba man ta zona algu masha nòrmal i lógiko pa mayoria di nos, pero pa miones di hende rònt mundu esei no ta e kaso. Aki na Kòrsou mes nos tin hendenan ku no tin e posibilidat di laba man frekuentemente pa motibu ku nan no tin akseso na awa. Organisashon Mundial di Salú (WHO) a instituí e dia aki na 2009 pa mundialmente pidi atenshon pa mihó kondishonnan sanitario na paisnan pober pa asina prevení malesa i salba bida di hende. Na paisnan pober higiena generalmente ta muchu mas defisiente ku serka nos.

E higiena defisiente aki ta kousa prinsipal di morto pa motibu di entre otro diarea i Covid-19 e último 2 añanan aki. Diarea, kousá pa mal higiena ta resultá den miones di morto pa aña na paisnan pober, prinsipalmente bou di mucha. Pero labamentu di man no ta importante na paisnan pober so. Aki serka nos mes labamentu di man ta un akshon importante ku mester keda hasí ku debido atenshon. Durante e krisis di Corona aki a aksentuá i papia hopi tokante labamentu di man komo un di e medidanan mas importante pa evitá kontagio ku e malesa. Laba man bon i frekuentemente ta redusí konsiderablemente e chèns pa plama e vírùs via nos mannan. Komo ku hopi malesa entre otro Covid-19 ta plama rapido via nos mannan, ta pidi komunidat èkstra atenshon awe, Dia Internashonal di Laba Man, pa laba bo man frekuentemente diariamente.

Ministerio konserní