Notisia

Willemstad – Paisnan rònt mundu a kumbiní na 1990, ku ta bai traha riba protekshon i bienestar di nos muchannan. P’esei awe 20 di novèmber, nos ta selebrá dia Internashonal di Derechi di Mucha.

Minister sr. Hensley Koeiman i ministerio di Desaroyo Sosial, Labor i Bienestar (DSLB) ta felisitá tur nos mucha-, hóben- i edukadornan riba e fecha importante aki.

Riba un base diario, den nos ministerio DSLB, ta pone énfasis direkto i/òf indirekto na protekshon i bienestar di nos mucha- i hóbennan. Nos ta logra esaki dor di brinda sosten riba diferente area e.o. finansiero, laboral i guia familiar.
Konhuntamentu ku nos partnernan den Reino Hulandes i lokal, nos ta pone man na obra den proyekto i programanan pa nos mucha- i hóbennan por lanta den un ambiente saludabel.

• Plataforma IVRK (Internationaal Verdrag inzake de Rechten van het Kind) ta ser presidí pa Ministerio di DSLB i tambe pa dos aña kaba Sektor Famia i Hubentut di ministerio DSLB tin e honor di presedí Interlandelijke Taskforce Kinderrechten (ITK). Den kuadro di esaki nos ta selebrá e dia aki ku dos debate.
• Awe nos tin un debate internashonal den kolaborashon ku Unicef entre e islanan BES, Aruba i Kòrsou; titulá: “Mijn Nieuwe Wereld”. Nos hóbennan di Kòrsou lo debatí kontra Aruba i Boneiru, tambe nan ta para komo hurado na momentu ku Aruba i Boneiru ta debatí. Por sigui e debate via facebook.
• Mañan 21 di novèmber nos hóbennan lo debatí den un debate nashonal, titulá: Mas bo debatí, mas fuerte bo opinion ta. Por sigui e debate aki via TV Direct di 17:00 pa 18:00.
  Na tur e dos debatenan aki, nos ta realsá artíkulo 12 di IVRK ku ta indiká ku mucha tin derechi pa duna su mes opinion i wòrdu skuchá tambe dor di gobièrnu.

Minister Hensley Koeiman di DSLB ta invitá kada un ku ta responasbel pa un òf mas mucha i/ òf hóben, pa buska informashon i apliká e artíkulonan di e tratado Derechi di Mucha. Esaki ta disponibel riba wèpsait di Gobièrnu di Kòrsou i tambe riba pagina di Facebook di Plataforma IVRK.
Kuminsando for di ayera 19 novèmber por sigui Tele Curaçao durante un luna largu entre 19:00 – 20:00 pa diferente tópiko tokante Tratado Derechi di Mucha. Pa asina nos kada un por kontribuí na un futuro briante pa nos próksimo generashonnan.

Pueblo di Kòrsou por sigui konta ku ounke situashon mundial i na Kòrsou ta difísil; nos lo sigui traha na bienestar i protekshon di nos mucha- i hóbennan.

MAS NOTISIA

Ministerio konserní: Desaroyo Sosial, Labor i Bienestar