Publiká riba 05 Mei 2021
WILLEMSTAD – “Premio Cola Debrot” ta un premio riba tereno kultural ku for di 1968 ta keda anualmente otorgá na un persona òf organisashon ku a hasi trabounan meritorio riba tereno di arte. Tin diferente kategoria ku ta ser premiá: arkitektura, arte visual, baile, folklor, literatura, músika, teater òf siensia. Na aña 2020 a toka turno na e kategoria di “Teatro”. E Premio Cola Debrot pa 2020 ta otorgá na sra. Laura Quast pa su esfuersonan grandi brindá riba tereno di Teatro. A hasi entrega di e Premio Cola Debrot na sra. Laura Quast e aña akí komo ku pa motibu di Covid-19 aña pasá e entrega no tabata posibel.E entrega a bai den un esfera ameno i responsabel kaminda Promé Minister sr. Eugene Ruggenaath a entregá na sra. Laura Quast e boton di oro representando e flor di larahá i Minister di Enseñansa, Siensia, Kultura i Deporte sr. Steven Croes a entregá e “oorkonde” korespondiente.
Premio Cola Debrot ta konsistí di un boton di oro representando e flor di larahá, un sertifikado i un suma. E proposishon pa otorgá Premio Cola Debrot ta keda hasí pa Konseho Kultural Kòrsou ku tur aña di nobo ta instituí un komishon independiente pa skohe e ganador di e prestigioso premio. Pa e aña 2021 no a logra nominá un ganadó riba tereno di literatura pa motibu di sirkunstanshanan di COVID-19 i “lockdown”.
Gobièrnu di Kòrsou ta felisitá sra. Laura Quast pa kere den Kòrsou, den positivismo i un konstrukshon sano di nos pais kaminda ta yuda i guia un gran parti di nos komunidat pa ekspresá nan mes pa medio di Teatro. Ekspreshon den su generalidat i ekspreshon artístiko ta importante pa desaroyo di e komunidat den su totalidat. Pesei Gobièrnu di Kòrsou ta yama danki alabes na Konseho Kultural Kòrsou pa un tremendo trabou.
** riba e potrètnan athunto di momentu ku Minister Presidente sr. E. Rhuggenaath ta entregá e boton i Minister enkargá ku Kultura ta hasi entrega di e ‘’oorkonde” komo parti di e Premio Cola Debrot na sra. Laura Quast.
Pa mas informashon di sra. Laura Quast por bishitá:
– Dokumentario sra. Laura Quast mei 2020
– Dokumentario sra. Laura Quast nov 2020
– Komunikado Mei 2020 Premio Cola Debrot
