Publiká riba 01 Mart 2022
Willemstad- Gobièrnu di Kòrsou a yega na e desishon pa entrante djabièrnè awor dia 4 di mart 2022, minimalisá e frekuensia di publikashon di e sifranan rondó di COVID-19 na Kòrsou. E minimalisashon aki ta nifiká ku despues di e siman aki ta bai kuminsá publiká e sifranan rondó di COVID-19 na Kòrsou solamente 1 biaha pa siman riba djabièrnè.
Ya pa kasi dos (2) aña, nos a kustumbrá, ku diariamente Gobièrnu di Kòrsou ta aktualisá entre otro e sifranan di kontagio, personanan ku a sali for di isolashon, hospitalisashon i fayesimentu komo konsekuensia di COVID-19 na Kòrsou. Durante e último simannan, nos por a tuma nota ku nos sifranan di kontagio diario a kuminsá baha konsiderablemente i huntu ku esaki Gobièrnu a tuma e paso pa poulatinamente kuminsá lòs for di medidanan mas estrikto i fiha nos bista riba alkansá un nivel di bida mas normal posibel ku COVID ainda meimei di nos.
Minimalisashon den e frekuensia di publikashon di sifranan, no ta impliká ku e Tim di Krísis lo bai paga ménos atenshon na e desaroyonan rondó di COVID-19 na Kòrsou. Realidat ta, ku ainda COVID-19 ta un pandemia mundial i ku ketubai nos mester sigui tin debido atenshon na e efektonan ku posiblemente esaki por trese pa nos komunidat. Diariamente e tim ta bai sigui kompilá i analisá tur sifra rondó di COVID-19 na Kòrsou i riba kada djabièrnè lo publiká un bista di e desaroyonan di henter e siman. Si akaso den futuro ta nesesario pa bolbe subi e frekuensia di publikashon di e sifranan di COVID na Kòrsou, Gobièrnu lo hasi esaki.
Suavisashon di medidanan i e redukshon den e frekuensia di publikashon di sifranan di Covid-19, no mester nifiká ku nos ta ban kuida ménos. E normal nobo ku nos ke yega na dje, ta na nos alkanse solamente si kada siudadano di e pais akí sigui duna di nos parti.
