Publiká riba 08 Desèmber 2019
WILLEMSTAD – Ministerio di Hustisia a tuma nota di un artíkulo den kual sr. George Lichtveld ta duna su “opinion” i deliberadamente kontra tur bèrdat ta akusá Minister di Hustisia i diferente ámtenar i trahadó di un fundashon ku ta brinda servisio na gobièrnu, di supuesto trato inhumano di un hóben Venezolano menor di edat ku te ku 30 di novèmber último tabata keda den e instituto JJIC na Kwartier. Ministerio di Hustisia ta refutá kategorikamente e akusashonan di sr. Lichtveld.
Sr. Lichtveld ta hasi uso di su derechi di ekspreshon pe konsientemente insultá i difamá trahadonan ku ta hasi nan trabou diariamente komo debe ser, basá riba nos leinan lokal i nos estado di derecho. Esaki no ta aseptabel. Ministerio di Hustisia ta lamentá ku sr. Lichtveld ta lansa yen di akusashon, konsientemente saka varios detaye for di konteksto, ta hasi komparashonan inaseptabel i ta insultá trahadonan ku nòmber, fam i hasta potrèt sin ningun base, sabiendo ku nan no por defendé nan mes pa motibu ku nan tin un asina jama “beroepsgeheim”.
LAMENTA
Loke ta hasi e situashon mas lamentabel ainda, ta ku sr. Lichtveld den su afan pa insultá i daña nòmber di hende, ta “lubidá” di menshoná e detaye importante ku dia 18 di yüni último, el a aserka Defensor di Pueblo riba e kaso menshoná i a base di esaki Defensor di Pueblo dia 5 di yüli 2019 a bishitá JJIC, papia ku e hóben Venezolana i mas aleu tambe wak e situashon di e i e otro muchanan ku tin un OTS ku ta keda den e instituto en general. Dia 20 di sèptèmber, Defensor di Pueblo a manda su rapòrt na e personanan konserní, inkluyendo sr Lichtveld.
Pa loke ta trata e hóben Venezolano na kual sr. Lichtveld ta referi, Defensor di Pueblo a konstatá despues di a papia ku e hóben mes, ku e tabata wòrdu bon tratá. Esaki e hóben mes tambe a konfirmá na Defensor di Pueblo. E hóben a informá tambe ku el a desaroyá un relashon di konfiansa ku su “begeleider” di JJIC. E hóben a splika mas aleu ku e tabata risibí guia sikologiko asina e tabatin nesesidat di esaki i ku el a hasi uso di e oportunidat aki varios biaha. Tambe e a informa ku si pa kualke motibu e no por a papia inmediatamente ku su sikólogo, trahadonan di JJIC mes tabata dun’é e sosten emoshonal nesesario.
El a nota si, ku e no tabata kontentu ku e trayekto interno di edukashon ku JJIC tabata brind’é, pa motibu ku esaki tabata bou di su nivel. Tambe e hóben tabata deseá mas libertad pa move den e instituto pero tambe pafó di e instituto. Di otro un banda e hóben tabata kontentu ku e guia i trato ku e tabata risibí den JJIC i e tabatin akseso liber na guia sikológiko i médiko.
HUIDA
Ta importante pa remarká ku den e reunion ku a tuma lugá dia 21 di juli di e aña akí, na kual sr. Lichtveld ta referí na dje, entre representantenan di Ministerio di Hustisia i e abogadonan di e menor di edat, a hasi palabrashonnan konkreto na interes di e menor, ku JJIC i e gezinsvoogd a kumpli kuné debidamente. Riba petishon di su abogadonan GVI a evaluá i aseptá un famia serka kual e menor por a kuminsá bai keda den wikènt pa e por tin mas kontakto ku hende pafó di e instituto i tambe a regla pe bai un skol preparatorio pafó di e instituto. Tur esaki basa riba evaluashon di su komportashon ku no tabata duna señal mas ku e lo tin intenshon pa huí.
Sinembargo dia 20 di sèptèmber último, e menor a hui for di e sentro di enseñansa kaminda e tabata sigui un kurso ku ayudo di otronan. Meskos ku ta e kaso ku tur otro mucha ku ta bou di kustodia di gobièrnu i ku huí, JJIC a pidi Polis pa hasi un buskeda. Ora Polis a hañ’é i a tresé bèk JJIC, e instituto a apliká e mesun prosedura ku ta apliká pa tur otro mucha ku tin OTS i ku keda afo di e instituto pa un tempu largu. Esaki pa protekshon di e otro muchanan den e instituto.
Manera e hóben en kuestion a regresá JJIC e la duna di konosé ku e no ke keda Kòrsou mas i ku e ke regresá bèk su pais mas pronto posibel. E la deklará esaki por eskrito tantu na outoridatnan hudisial (den presensia di su abogadonan), komo na su abogadonan mes. E deseo aki finalmente a konkretisa tambe, djasabra 30 di novèmber último.
Ministerio di Hustisia ta lamentá un biaha mas, ku sr Lichtveld ta “lubidá” e detayenan importante ariba menshoná, den su afan pa insultá I difamá trahadonan públiko.
