Publiká riba 26 Yanüari 2023
Willemstad- Ministerio di Desaroyo Ekonómiko (MEO) huntu ku Lokèt di Pèrmit ta anunsiá ku último fecha pa hasi petishon pa un pèrmit pa ‘standplaats’ òf ‘ vent’ temporal pa Karnaval 2023 ta djabièrnè 27 di yanüari 2023 pa 12’or di mèrdia. E fecha ta konta pa tur e marchanan.
E pèrmit di ‘standplaats’ ta e oportunidat ku Gobièrnu ta duna pa na un lokalidat, riba e ruta di Karnaval, por para bende produkto. Pèrmit di ‘vent’ ta esun ku e persona por kana bende riba e ruta di karnaval.
Huntu ku e formulario yená mester trese entre otro identifikashon bálido i pa ‘standplaats’ e komprobante di prekario. Si ta bai bende kuminda, mester trese tambe ‘keuringskaart’ i ID válido di tur persona.
Petishon pa e pèrmit deseá mester wòrdu hasí personalmente na Lokèt di Pèrmit, Saliña 127 entre 8’or di mainta pa 12’or di mèrdia.
