Notisia

Willemstad – Ministerio di Desaroyo Sosial, Labor i Bienestar ta konvensí ku Kòrsou tin hopi potensial pa atendé ku retonan usando su mes resistensia i elastisidat (veerkracht).

E delaster añanan tabata bastante pisá pa Kòrsou. Entre otro, e krísis ekonómiko, kriminalidat, pobresa alarmante, instabilidat polítiko ta retonan ku tin influensia riba hopi hende na Kòrsou.

Afortunadamente nos tin hopi potensial riba nos isla. Resientemente hopi hende a sa di tene nan kabes riba awa i esaki ta muestra di nos resistensia i elastisidat, Kai Lanta i Sigui. Lanta bèk, sigui pa dilanti i e afan pa sigui buska solushon, chèns i posibilidatnan, tur ta karakterístikanan ku ta manifestá nan mes kada biaha den e siudadano di Kòrsou.

E siudadano di Kòrsou tin hopi (veerkracht) forsa i perseveransia. Komo gobièrnu ta importante pa nos kultivá e fortalesa aki i amplia lokual ta positivo i ta kana bon. Un siudadano, un gobièrnu i un pais ku ta krese no opstante e retonan riba su kaminda, na esei nos mester keda konstruí.

Esei no por sin un kambio den nos forma di pensa i anda for di nos Sektor. Den e kuadro aki riba 4 di mart 2020, Sektor di Desaroyo Sosial a tene un dia di estudio interno pa pone e promé paso pa atendé ku kliente usando su mes fortalesa, su resistensia i elastisidat (strength-based “veerkracht”).

Durante e dia di formashon aki koleganan a siña kon, for di e vishon orientá na uso di propio fortalesa, resistensia i elastisidat, nos por hasi trabounan i aktividatnan di un otro forma. Nan a siña kiko ta strength-based “veerkracht” i kiko por spera di nan pa por realisá e kambionan den e periodo benidero.

Banda di esei a tuma lugá un seshon di brainstorming kaminda personal tabata aktívamente envolví den e transformashon di un sistema basá riba sosten sosial pa un sistema basá riba “veerkracht” (propio forsa).

Minister Koeiman a duna su aporte kompleto pa e dia aki por a bira un realidat. E tabata un dia hopi edukativo i plasentero.