Publiká riba 06 Yüli 2020
WILLEMSTAD – Riba djaluna 6 di yüli 2020 Gobièrnu di Kòrsou a risibí un pakete di Hulanda ku ta inkluí dokumentashon amplio di e kondishonnan nobo pa por sigui risibí sosten finansiero di Hulanda. Despues di a tuma nota di e kontenido, promé impreshon di Gobièrnu ta ku mayoria di e kondishonnan aki ta tacha derechinan fundamental ankrá den nos Statüt, ta afektá nos demokrasia i no ta kuadra ku nos leinan. Hulanda hasta ta eksigí delantá ku Parlamento mester bai di akuerdo ku un base amplio di un lei di konsenso nobo i kambio di e lei eksistente den reino. Pasó si no, esei ta influensiá e sosten finansiero di Hulanda. E pakete ta di tal índole ku implementashon di nan – ku tur probabilidat – finalmente lo afektá bienestar i stabilidat di nos pais severamente.
For di momentu ku Gobièrnu a aserká Hulanda pa ayudo finansiero, a para habrí pa e kondishonnan ku Hulanda a proponé. Sinembargo, Gobièrnu no por sigui aseptá e kondishonnan aki sin mas. No solamente pa ku e kontenido pero tambe e forma ku Hulanda ta imponé i e término kòrtiku ku no ta laga espasio pa por analisá e proposishonnan na un manera nòrmal i responsabel. Esaki ta inkluso un kontrato ku konsekuenshanan hopi impaktante i un lei di konsenso nobo. Nòrmalmente esaki ta eksigí un trayekto di negosashon.
Tambe Gobièrnu di Hulanda ta ninga di duna e siguiente parti di sosten di likides pa e lunanan di yüli i ougùstùs si Gobièrnu di Kòrsou no aseptá tur kondishon di Hulanda inkondishonalmente. E proposishon aki no ta kuadra ku e konseho di Cft ku si a konsehá pa duna un parti di e likides nesesario pa e lunanan benidero.
Motibu prinsipal ta e echo ku Hulanda ta presentá Kòrsou ku kondishonnan i proposishonnan nobo solamente 4 dia promé promé ku Konseho di Minister di Reino tuma un desishon definitivo riba djabièrnè 10 di yüli benidero. Gobièrnu ta opiná ku esaki en apsoluto no ta algu realístiko mirando e embergadura di e kondishonnan aki i e echo ku Kòrsou komo pais no ta haña tempu pa fiha posishon amplio riba e proposishonnan nobo aki. Un di e proposishonnan di Hulanda ta pa entre otro establesé un instituto na Hulanda ku ta determiná tur aspekto di e maneho finansiero, reformanan gubernamental i ekonómiko i alokashon di e fondonan ku ta bai pa Kòrsou. Esaki ta enserá ku Hulanda ta lanta un entidat konsistiendo di 3 eksperto hulandes ku, a base di leinan hulandes, lo tuma desishonnan ku ta konserní komunidat di Kòrsou, Aruba i St. Maarten pa un periodo di 7 aña largu. E proposishon aki ta den bista di Gobièrnu kompletamente írasonabel i no ta kuadra ku e espíritu di kolaborashon ankrá den Statüt kaminda paisnan ta interkambiá ku otro.
E pandemia di COVID-19 a trese konsekuensianan hopi fèrfelu pa nos komunidat, ku a pone ku no a keda Gobièrnu niun otro opshon ku aserká Hulanda pa ayudo finansiero. Esaki saliendo for di e punto di bista di e sentido di solidaridat ku lo mester biba entre e paisnan den Reino. Pero Gobièrnu ta konsiente ku el lo no por tuma un desishon ku konsekuensia asina estrecho pa bida diario di pueblo pa largo plaso sin konsultá. Konsekuentemente, Gobièrnu den e dianan benidero lo sigui deliberá tokante kon atendé ku e punto aki i komuniká debidamente ku komunidat riba tur e kondishonnan i nan konsekuensia. Pa esaki, Gobièrnu di Kòrsou ta pidi komunidat pa sigui e Relato di Dia mañan djamars 7 di yüli pa 11:30’or di mainta, pa skucha mas detaye tokante e pakete di proposishonnan ku a risibí.
