Notisia

Personanan ku no a haña un ‘aanslag Onroerendezaakbelasting’ mester entregá un deklarashon na Inspekshon di Impuesto promé ku 1 mart 2020

Willemstad – Minister di Finansa ke kòrda tur hende ku e ‘Landsverordening onroerendzaakbelasting 2014’ (OZB) a kambia entrante di 1 sèptèmber 2019. Nos ta referí na P.B. 2019, nr. 55.Meta di e anunsio aki ta pa informá doñonan di i otro personanan outorisá pa propiedat inmóbil na tempu en bista di e but inkorporá den e landsverordening, pa asina nan por tuma e akshon korekto promé ku 1 mart 2020.

Personanan, ku ta doño di un propiedat inmóbil na Kòrsou òf pa motibu di propiedat òf un derechi limitá (por ehèmpel usufrukto(vruchtgebruik) òf propiedat ekonómiko) por hasi uso di un propiedat inmóbil, ta suheto na OZB. Bo mester paga e OZB si bo a haña un papel di belasten. No den tur kaso Inspekshon di Impuesto tin e informashon korekto pa manda un aanslag na e persona konserní. Pa e motibu ei a inkluí den ‘Landsverordening OZB 2014’ ku personanan ku no a risibí un aanslag pa OZB mester hasi deklarashon na Inspekshon di Impuesto. Por distinguí dos situashon diferente:

• Un akshon pa un solo biaha den kual kontribuyentenan mester hasi deklarashon na Inspectie der Belastingen si den e 5 añanan ku a pasa nan no a haña un aanslag pa OZB. Si den añanan 2014-2018 bo no a haña un aanslag, bo mester hasi deklarashon di esaki na Inspekshon di Impuesto, promé ku 1 mart 2020.
• Un obligashon anual pa e kontribuyente indiká ku den e aña anterior e no a risibí un aanslag. Por ehèmpel, esaki por nifiká ku si den 2019 e kontribuyente no a risibí un aanslag pa 2018 e mester hasi deklarashon di esaki na Inspekshon di Impuesto.

Bo por hasi deklarashon na Inspectie der Belasting pa medio di un karta dirigí na Inspekshon di Impuesto, sekshon OZB. Den e karta bo mester menshoná bo nòmber, adrès, number di Crib, e fecha den kual bo a optené e propiedat inmóbil i bo mester indiká e balor di e propiedat inmóbil. Bo por entregá e karta na World Trade Center Curacao, Piscaderaweg òf bo por mail e karta na onroerendezaakbelasting@gobiernu.cw.

Personanan, ku no ta kumplí ku e obligashon di deklarashon, lo haña un but di 100% di e montante ku nan ta debe.

MAS NOTISIA

Ministerio konserní: Finansa