MEO ta para ketu na balor i balentia di e sektor durante e pandemia di COVID-19 - Informashon tokante Gobièrnu di Kòrsou Bo opinion

Notisia

MEO ta para ketu na balor i balentia di e sektor durante e pandemia di COVID-19

Geplaatst op 25 June 2021 dor di Ministerio Desaroyo Ekonómiko

Den kuado di dia Mundial di Empresanan Mikro, Chikí i Mediano

MEO ta para ketu na balor i balentia di e sektor durante e pandemia di COVID-19

Willemstad- Tur aña riba 27 di yüni, Nashonnan Uní ta para ketu na e ròl klave ku empresanan mikro, chikí i mediano tin den paisnan den desaroyo. Tema prinsipal e aña akí riba e dia di Empresanan Mikro, Chikí i Mediano ta “MSMEs: First responders to societal needs.” 

Den e aña tras di lomba, e sektor di empresanan mikro, chikí i mediano mundialmente a sufri un gòlpi inmenso komo konsekuensia di e pandemia di COVID-19; un gòlpi ku a pone hopi di e empresanan akí na rant di sobrebibensia. Meskos ku gobièrnunan rònt mundu, nos gobièrnu tambe rápidamente mester a mobilisá pa por a yuda e empresanan akí tene kabes riba awa durante e periodonan di ‘lockdown’ i reforsá nan mas tantu posibel pa por keda riba pia despues di e pandemia tambe. No ta pòrnada ta referí na e sektor akí komo e wes’i lomba di nos ekonomia. E sektor di empresanan mikro, chikí i mediano ta akapará no ménos ku 98% di e total di empresanan na Kòrsou i ta sòru pa 60% di nos kuponan di trabou. 

Miéntras outoridatnan kompetente tabata tuma medidanan pa salbaguardiá salubridat públiko di nos komunidat durante e aña tras di lomba, Ministerio di Desaroyo Ekonómiko (MEO) huntu ku entre otro Ministerio di Finansa, MiNegoshi, Qredits, Korpodeko i otro instansianan, a aktivá pa krea un klima di posibilidat pa e empresarionan den e sektor akí, ku ta inkluí akseso na finansa, informashonnan nesesario i kapasitashon.

Pa por logra esaki, Ministerio di Desaroyo Ekonómiko (MEO) a krea e ‘Programa di Sosten Pandemia COVID-19’ ku e intenshon pa garantisá sosten riba término kòrtiku na empresanan mikro, chikí i mediano di moda ku nan por a sobrebibí durante e periodo di krísis. Pero alabes, a desaroyá i ampliá e mésun programa akí den un programa pa brinda apoyo, sosten i asistensia na e sektor akí riba término largu tambe; e asina yamá ‘Resilient Entrepreneurship Development Program’ (REDEP). Via di e programa di sosten akí, empresarionan lokal por bini na remarke pa risibí entre otro coaching grátis serká konseheronan sertifiká. Tambe, e programa ta brinda e posibilidat pa risibí training i kapasitashon grátis a base di nesesidatnan spesífiko di e empresa. Aparte di e posibilidatnan di coaching i kapasitashon, e programa ta ofresé tambe, pa medio di e portal di Fondo di Sosten, e posibilidat di finansiamentu na e empresanan, den forma di krédito ku interes abou, di moda ku mas tantu posibel nan por kontinuá ku nan aktividatnan normal i por mantené trahadónan den servisio. Un total di 659 empresa a risibí òf ta risibiendo coaching via di e programa, i 75 empresa a risibí finansiamentu via e fasilidat di krédito pa un total di Fls 1.62 mion florin.

Den kuadro di Dia Mundial di Empresanan Mikro, Chikí i Mediano, mas ku nunka Ministerio di Desaroyo Ekonómiko (MEO) ke para ketu na e tremendo perseveransia, solidaridat i forsa di boluntat di empresarionan den e sektor asina importante akí. Sin mas, no por lubidá tampoko e kontribushon inmenso di e diferente organisashon i ministerionan pa a logra te ku awor brinda perspektiva i speransa na e sektor asina krusial akí den nos ekonomia i pa yuda mantené mayoria empresa riba pia. 

Ainda nos no a sali kompletamente for di e pandemia i, mirando esaki, ta di gran importansia pa komo empresario sigui kontribuí aktivamente dor di kumpli ku reglanan vigente di seguridat i salubridat. Mas nos kada un duna nos kontribushon, mas lihé nos tur ta logra sali afó.

Ministerio konserní