Minister di Enseñansa, Siensia, Kultura i Deporte ta risibí dòpinan pa orea! - Informashon tokante Gobièrnu di Kòrsou Bo opinion

Notisia

Minister di Enseñansa, Siensia, Kultura i Deporte ta risibí dòpinan pa orea!

Geplaatst op 17 January 2018 dor di Ministerio Enseñansa, Siensia, Kultura & Deporte

Quota Club den su kampaña “di mas zonido, ayó oido”…… Minister di Enseñansa, Siensia, Kultura i Deporte ta risibí dòpinan pa orea

Lider di proyekto di kampaña “di mas zonido, ayó oido”, señora Rainelda Hellement huntu ku miembronan di proyekto, señora Tirzah Doran i señora Carol Grekko,  a hasi entrega di dòpinan pa orea, un buki i un poster tokante peliger di zonido duru na Minister di Enseñansa, Siensia, Kultura i Deporte, señora Marilyn Alcalá-Wallé. Quota pa vários aña kaba ta trata di hasi komunidat konsiente di e peliger ku di mas zonido tin pa e oido. E proyekto aki ta importante pa motibu ku si no kuida oido awor aki, prinsipalmente di nos hóbennan, esaki lo tin konsekuensia a largu plaso pa nos salubridat públiko. Señora Doran a splika ku Quota tin 10.000 dòpi di orea di kual 3.000 ta destiná pa tur mucha ku ta partisipá den marcha hubenil. E sobrá 7.000 ta pa benta i ta kosta solamente Naf.1,00 pa par. Dòpi pa orea ta optenibel serka tur miembro di Quota. Pa e kampaña ta un éksito, Quota ta konta riba sosten finansiero di instansia i empresanan. Hopi persona  ku ta eksponé nan mes na zonido duru, no sa mes ku nan tin problema ku nan oido.

Ora e oido haña daño, e no ta drecha mas. P’esei ta mas ku klaro, mihó prevení ku lamentá di akuerdo ku señora Doran. E kampaña no ta pa temporada di karnaval so pero e ta algu masha importante pa hinter aña. Señora Doran ta indiká ku uso di un simpel dòpi pa orea por yuda bo oido keda pa semper. Ku pèrdida di bo oido bo no por funshoná debidamente,  por ehèmpel: na skol, trabou, durante reunion i tambe den relashonnan. Ademas e ta enfatisá ku komunidat mester duna balor na su oido. Un persona su oido ta presioso i e ta spera ku no solamente durante periodo di karnaval pero hinter aña komunidat lo kuida pa motibu ku di mas zonido ta ayó oido. Minister di Enseñansa, señora Alcalá-Wallé a yama miembronan di Quota masha danki pa nan bishita i a akseptá e dòpinan pa orea for di man di señora Doran. Tambe Minister a akseptá e buki “Knoop het goed in je oren” skirbí pa diferente eksperto lokal serka señora Hellement i ku lo wòrdu repartí na diferente skol sekundario. Señora Grekko a entregá Minister un poster ku ta rekordá tur hende ku di mas zonido ta ayó oido.

Por último, Minister Alcalá-Wallé ta yama Quota Club masha danki pa nan gesto i pa nan esfuersonan pa konsientisá komunidat i yuda protehá nos hóbennan. Pa hasi pedido di dòpi di orea por tuma kontakto via Facebook ku: Quota International of Curaçao. Tambe por tuma kontakto ku sra. Doran, tel: 5126727.

Ministerio konserní