Bo opinion

Notisia

Minister Marilyn Alcalá-Wallé durante “Vierlandenoverleg”:

Geplaatst op 18 February 2019 dor di Ministerio Enseñansa, Siensia, Kultura & Deporte

Riba 7 i 8 di febrüari último ministerio di Enseñansa, Siensia, Kultura i Deporte (ESKD) a organisá un “Vierlandenoverleg” kaminda Minister di ESKD pa Kòrsou, sra. Marilyn Alcalá-Wallé; Minister di Enseñansa, Siensia i Desaroyo Sostenibel di Aruba, sr. Armando Lampe; Minister di Finansas, Asuntunan Ekonómiko i Kultura di Aruba, sra. Xiomara Ruiz-Maduro; Minister di Enseñansa, Kultura, Hubentut i Deporte di Sint Maarten, sr. Wycliffe Smith; Minister di Enseñansa, Kultura i Siensia di Hulanda, sra. Ingrid van Engelshoven a dialogá riba diferente punto di atenshon en komun, relashoná ku Enseñansa, Siensia i Kultura.

Durante e enkuentro alabes a toka e tema di finansiamentu di estudio i mehorashon di e fluho di studiantenan pa estudionan avansá i superior na Hulanda. I pa mehorá éksito di nos studiantenan den eksterior.

Pa lokual ta trata finansiamentu di estudio:

1. E ministernan a deklará ku forsa di pago di debedónan, denter di e paisnan den Reino ta keda tratá igual i paisnan den e parti Karibense den Reino ta bai kuminsá ku un kampaña di informashon relashoná ku esaki.

2. Tambe e ministernan di e parti Karibense di Reino a yega na akuerdo ku tur Memorandum of Understanding (MOU) ku wòrdu firmá dor di e paisnan Aruba, Kòrsou i Sint Maarten ku institutonan di enseñansa den region, ta keda kompartí ku otro di manera ku e ta fasilitá e proseso pa sera akuerdonan ku skolnan avansá

3. Banda di esaki e ministernan di Aruba, Kòrsou i Sint Maarten ta hasi nan esfuerso pa debedónan ku ta paga bèk lokalmente, risibí dispensashon di gastunan di provishon di divisanan. 

Pa loke ta trata mehorashon di e fluho di studiantenan pa estudionan avansá i superior na Hulanda mehorá éksito di nos studiantenan den eksterior:

Ministernan a akordá ku pa medio di instalashon di un grupo di trabou, e ministernan di e paisnan Karibense, huntu ta hasi un análisis kuantitativo i kualitativo di e konekshon entre e nivel di estudio ku e hóben a kaba na Kòrsou, ku e nivel di estudio ku e hóben ta sigui na Hulanda, e asina yamá “aansluitingsproblematiek”. Esaki ta sosodé ku sosten di minister di Hulanda, ku lo fasilitá e informashon ku ta nesesario. Tambe Hulanda ta bai formulá proposishonnan pa mehorá éksito di e studiantenan ku a terminá nan skol sekundario na un di e tres paisnan. 

E enfoke mester ta riba studiamentu ku éksito den region. E grupo di trabou ta bai saka un relato denter di 6 luna.

************************************************************************************************************

Ministerio konserní