Publiká riba 04 Mart 2020
WILLEMSTAD- Minister di Desaroyo Ekonómiko, sra Giselle Mc William resientemente a hasi un bishita di trabou serka Fundashon Marshe. Na nòmber di Gobièrnu di Kòrsou i bou di supervishon di Ministerio di Desaroyo Ekonómiko (MEO), Fundashon Marshe ta karga e tarea di manehá i atministrá tur edifisio i aktividatnan di marshe den nos sentro di siudat.
Den e kuadro aki, Minister Mc William a hasi un bishita periódiko na e Fundashon kaminda el a risibí splikashon tokante entre otro e funshonamentu di e marshenan en kuestion. Durante e bishita aki, sra. Mc William a haña un mihó bista tambe den e historia di e marshenan den nos sentro di siudat i e situashon aktual komo tambe e retonan ku e marshenan ta konfrontá. Sra Roxanne de Leeuw, direktora di Fundashon Marshe a duna sra minister splikashon amplio di e trabounan di e fundashon i e perspektiva pa ku desaroyo di e marshenan den nos sentro di siudat. 
No muchu tempu pasá e edifisio di Plasa Bieu a keda kompletamente renobá i awor MEO huntu ku Fundashon Marshe ta hasiendo preparashonnan pa asina implementá e plan di organisashon di edifisio i áreanan di marshe den sentro di siudat (Inrichtingsplan Marktgebouwen en –gebieden Binnenstad). E plan aki ya a keda akordá pa Konseho di Minister i ta inkluí proyektonan pa renobá entre otro nos Marshe Rondó i duna esaki un konsepto nobo i moderno.
Despues di a risibí tur informashon, minister a hasi tambe un rekorido tantu den Marshe Rondó komo tambe den Plasa Bieu.
