Publiká riba 12 Aprel 2018
Willemstad – Ministerio di Desaroyo Sosial, Labor i Bienestar (DSLB), den su empeño pa mehorá su servisionan, a organisá un kurso pa personal di Sektor di Labor i sobrá otro Sektornan.
Ta trata di 4 seshon intensivo bou di enkargo di Dr. Nychel Fermin, MBA, Ph.D. den kual a dialogá pero tambe tabatin workshop interaktivo ku personal ku e tópiko ku mundialmente ta keda diskutí, esta: “Work Ethics in a changing world of work”.
Introdukshon di automatisashon, Inteligensia artifisial (AI), “the internet of things” mas i mas tin nan impakto riba tur tipo di trabou tradishonal. Klientenan di Sektor di Labor ta eksperensiá e kambionan aki i trahadónan mester por komprondé esaki pa asistí e klientenan pero tambe kuminsá komprondé e impakto den nan mes trabou.
Mester keda tene kuenta ku e kambionan aki i mantené un étika di trabou haltu. Mester tene kuenta ku e balansa entre trabou i famia. Mester realisá ku nos ta traha bou di e kambionan rápido den outomatisashon i outomatisashon por tin impakto riba trabounan ehersé pa hende ku ta birando obsoleto.
Na mes momentu mester realisá ku tin trabounan kreativo ku ta bini na nan lugá. Nos no por ignorá e kambionan aki pasombra nan tei kaba. Siña abilidat nobo kontinuamente tambe ta di gran importansia, e asina yamá “Lifelong learning”.
Ministerio di Desaryo Sosial, Labor i Bienester ta deseá tur kursista hopi éksito.
