Publiká riba 05 Yüli 2020
WILLEMSTAD – Ministerio pa Desaroyo Sosial, Labor i Bienestar, lo organisá un seri di treinen pa entre otro empoderá ‘risibidónan di ònderstant’, personanan ku ta buskando empleo, personanan ku ke forma nan mes pa ehekutá un funshon di lider, personanan ku ke funshoná den un òf otro organisashon di un forma responsabel, efektivo i efisiente i personanan ku ke desaroyá un idea di negoshi. E treinennan lo kubri un diversidat ámplio di temanan ku lo prepará kada persona den e gruponan di enfoke menshoná pa enfrentá retonan i sali mas bon posibel for di nan. Un bon preparashon ta esensial pa por logra esaki.
E treinennan ta ser duná pa profeshonalnan di ministerio di SOAW mes i algun profeshonal eksterno (boluntario).
Lo duna e treinennan den oranan di mainta i tra’i mèrdia. Lo hasi uso mas tantu posibel di nos Sentronan di Bario. Ta start dia 8 di yüli ku seshonnan di informashon na e siguiente Sentronan di Bario: Sentronan di Bario; Seru Papaya, Montaña i na Sentro Multifunshonal na Barber (kaminda ántes tabata Jozef Sivilis AGO).
Un yamada ta bai na personanan interesá pa registrá mas pronto posibel riba e nr. di WhatsApp +5999 510-7629. Por registrá tambe na e Sentro di Barionan ariba menshoná.
Ministerio di SOAW lo anunsiá via kanalnan di komunikashon kon lo sigui ku e proyekto aki. Manera menshoná ariba, e idea ta pa hasi uso di mas tantu Sentro di Bario posibel pa duna e diferente treinennan, dependiente entre otro di interes di e interesadonan. Pues públiko por keda pendiente pa e informashonannan ku lo sigui.
Kada ken ta responsabel pa sigui forma su mes i mantené su mes informá segun desaroyonan ta tuma lugá. SOAW ta fasilitá den esaki.
