Publiká riba 22 Ougùstùs 2019
Willemstad – Minister di Tráfiko, Transporte i Planifikashon Urbano, sra. Zita Jesus Leito huntu ku Servisio pa Obra Públiko, (OW) ta anunsiá ku lo kuminsá ku trabounan pa desaroyá un plenchi na Charo pa altura di Warahamaweg. Esaki den kuadro pa embeyesé i krea sitionan di rekreashon den nos barionan.
E trabounan ta kuminsá dia 26 ougùstùs 2019 i lo tin un durashon di tres siman, i lo ta na enkargo di e kontratista Curaçaose Wegenbouw Maatschappij (CWM).
E trabounan ta enserá ku lo krea un espasio públiko, ku akseso komunitario ameno, pa rekreashon. Lo bai hasi uso di material duradero den forma di klenku i lo krea areanan berde ku ta forma parti integral di e diseño. A tene kuenta ku diferente medionan di rekreashon pa nos hubentut i nos grandinan, miéntras ku tambe lo traha un prieel i pone bankinan.
E diseño ta tene kuenta ku e posibilidat pa mas den futuro aloká e community-boxnan di C-post i tambe pa hasi uso grátis di e servisio di WiFi riba e plenchi.
OW ta gradisí komunidat adelantá pa e pasenshi i koperashon den realisashon di e trabounan.
Pa pregunta por yama òf whats app na 511-8582. Tambe por bishita e website www.vvrp.cw/proyekto pa tur informashon i desaroyo di proyektonan di OW.
