Publiká riba 23 Yüli 2020
WILLEMSTAD – Na momentu ku Gobièrnu di Kòrsou a tuma e desishon pa habri frontera pa paisnan ku ménos riesgo di e vírùs di Corona, a komuniká ku un di e kondishonnan ku pasaheronan mester kumpli kuné ta hasi un PCR tèst máksimo 72 ora promé ku bula pa Kòrsou. E PCR tèst aki por hasi riba diferente sorto di material humano. E tèst di mas sensitivo i pues ku un resultado mas konfiabel, ta esun riba e material di nanishi òf garganta. Un ménos sensitivo ta esun pa medio di hòrgel, ya ku vários bia ta resultá ku di e forma aki no ta logra señalá e vírùs di Corona. Den e kaso aki e resultado por sali “vals negatief”. For di ora ku a bin komprondé ku algun laboratorio na Hulanda ta uza solamente e método di hòrgel, Gobièrnu di Kòrsou a tuma e desishon pa no sigui pèrmití pasaheronan drenta Kòrsou ku a hasi un PCR tèst di hòrgel, pa asina evitá ku e vírùs di Corona plama i dado momentu resultá den transmishon lokal.
Den e kuadro aki, Ministerio di Salú, Medio Ambiente i Naturalesa for di 16 di yüli a aserká tantu KLM komo TUI, pidiendo nan pa indiká tur pasahero ku no lo aseptá e tèst di hòrgel mas, pero solamente esnan di via nanishi i garganta. Pa esaki a duna e areolíneanan te ku 20 di yüli pa por informá tur pasahero debidamente di e kambio aki. Sinembargo, riba djaweps 23 di yüli 2020 a drenta serka Departamentu di Epidemiologia e mensahe ku riba un buelo di TUI ku tabata na kaminda pa Kòrsou, tin un pasahero ku a tèst positivo pa e vírùs di Corona. Pa motibu ku tabatin pasahero ku a hasi e tèst di hòrgel promé ku TUI a logra informá nan di e kondishon nobo, a palabrá ku e pasaheronan aki mester hasi e tèst di nobo via nanishi òf garganta promé ku subi avion, pa asina risibí e resultado promé ku e avion yega Kòrsou. Ora ku e resultadonan a drenta a bin haña sa e ora ei ku un persona a tèst positivo, ni maske ku promé e resultado a sali negativo pa medio di e tèst di hòrgel.
Inmediatamente a tuma e medidanan nesesario pa na yegada di e avion di TUI apartá e pasahero ku a tèst positivo pa COVID-19 di e otro pasaheronan i pa despues poné den isolashon. Alabes a start un investigashon pa determiná e embergadura di e situashon ku a surgi, dor di averiguá si a kumpli ku bistimentu di ‘mondkapjes’ i mas instrukshon. Un inventario di tur persona ku a sinta den besindario di e pasahero a keda hasí, kaminda a determiná ku tur hende tabatin mondkapje bistí i tur hende a hasi un tèst ku resultado negativo. No opstante esaki, lo sigui monitoriá e pasaheronan aki den e dianan benidero pa wak si tin kualke desaroyo. E mesun kos ta konta pa e tripulante ku tabatin na bordo, kaminda entre otro a duna vários tep na esnan ku mañan lo regresá Hulanda i lo keda monitoriá esnan ku ta keda Kòrsou segun prosedura.
Gobièrnu di Kòrsou lo sigui hasi tur esfuerso nesesario pa apliká reglanan stringente ora ta trata di personanan for di paisnan ku rísiko haltu òf mediano, na momentu ku nan ta deseá di drenta Kòrsou. Aserka Gobièrnu ta pidi komunidat un bes mas pa yuda kombatí plamamentu di COVID-19 dor di sigui mantené nos mes na e reglanan di higiena i di distansha sosial.
