Notisia

Minister di Enseñansa, Siensia, Kultura & Deporte, Marilyn Alcalá-Wallé a reuní ku rektor di Universidat di Kòrsou, sr. Francis Delanoy.  Durante e reunion a papia tokante e areglo di kualifikashon pa lokual ta trata rekonosementu di e nivel di e kualifikashon den enseñansa ku ta mará na e diploma pa e estudionan di bachelor i master pa e idiomanan Papiamentu, Ingles, Spañó i Hulandes na e Fakultat General na “University of Curaçao” (UoC).

Ounke ku e nivel di un parti di e estudionan ku UoC tabata brinda na públiko den e diferente idiomanan menshoná tabata riba nivel di promé grado (1ste graads bevoegdheid), tabatin un diferensia di opinion den e balotashon di e nivel di kualifikashon ku a perdurá pa basta aña. Pa medio di un Dekreto (Landsbesluit) Minister Alcalá-Wallé a laga hasi un korekshon i a akordá un dekreto tokante kualifikashon pa dosente di idioma ku a optené e grado di Master na Universidat di Kòrsou (UoC).

Pa algun aña kaba dosentenan di idioma ku a finalisá nan estudio na UoC ta keda konsiderá na nivel di promé grado na Hulanda, Aruba, Boneiru i Sint Maarten, ku eksepshon di Kòrsou. Awor ku e lei aki a keda aprobá, nos dosentenan di Kòrsou tambe lo keda rekonosé na e mesun nivel ku otro partinan di Reino Hulandes.

Riba foto:
sr. Wladimir Kleinmoedig (Direktor di Enseñansa i Siensia), sra. Monique Esprit-Bouwman (Kolaborador di maneho enkarga ku aspekto hurídiko), sra.Susan Larmonie-van Heydoorn (Direktor di maneho di Ministerio di ESKD), Minister di ESKD sra. Marilyn Alcalá-Wallé, sr. Francis Delanoy (Rektor di UoC) i sra. Lisbeth Echteld (Kolaborador di UoC enkarga ku estudio nan superior). 

MAS NOTISIA

Ministerio konserní: Enseñansa, Siensia, Kultura & Deporte