Seremonia di ʹDodenherdenkingʹ e aña aki den forma simpel sin públiko - Informashon tokante Gobièrnu di Kòrsou Bo opinion

Notisia

Seremonia di ʹDodenherdenkingʹ e aña aki den forma simpel sin públiko

Geplaatst op 02 May 2020 dor di Ministerio Asuntunan General i Promé Minister

Willemstad – Dia 4 di mei 2020, Gobièrnu di Kòrsou ta konmemorá e viktimanan ku a kai durante 2do Guera Mundial i den tur guera te ku awor. Tradishonalmente, riba e dia aki, tin un seremonia solèm, durante kua mandatarionan, Gobernadó i outoridatnan militar di Reino ta para ketu na e hecho ariba menshoná.  Pa motibu di e situashon di COVID-19 e seremonia di e aña aki ta tuma lugá na un manera adaptá, pa evitá aglomerashon di hende. 

Promé Minister di Kòrsou, sr.Eugene Ruggenaath, huntu ku gobernadó, sra.Lucille George George-Wout i demas outoridatnan relevante, lo pone un krans na e monumento  di viktimanan di  Guera Mundial na Waaigat. Sr Roland Colastica ta deklamá un poema ku e tema di e aña aki, kual ta 75 aña libertat. Pa duna tòg oportunidat na tur hende, sigur e grupo di veterano di guera di Kòrsou, pa tòg sigui e seremonia, Gobièrnu a opta pa transmití e seremonia bibu via di Info 84 riba Flow. A pidi e diferente plantanan di televishon pa tambe pasa e señal.

Un petishon ta bai na pueblo di Kòrsou pa nos tur huntu konmemorá e fecha aki pa medio di hisa nos bandera ʹhalfstokʹ riba e dia aki. Ban reflekshoná kiko ta libertat su nifikashon i riba nos responsabilidat pa huntu nos traspasá libertat pa nos futuro generashonan. Ta pidi tur hende ku ta trafiká den e oranan di mainta den besindario di e seremonia, pa respetá e seramentu di kaminda promé i durante di e seremonia. Despues di e seremonia, pa mas òf ménos mitar di 10 di mainta, e kaminda banda di e monumento ta aksesíbel atrobe pa tráfiko.  

Ministerio konserní