Publiká riba 23 Sèptèmber 2021
WILLEMSTAD – Siman di Kultura 2021: “Konop’é, Hals’é i Traspas’é” ta ranka sali 26 di sèptèmber awor di forma virtual. Henter pueblo di Kòrsou por sigui e apertura ‘online’ riba tur plataforma sosial di Gobièrnu di Kòrsou òf via un otro kanal di preferensia.Manera ya a keda publiká anteriormente, lema di e siman ta: Konop’é, Hals’é i Traspas’é. Nifikashon di e lema ta pa huntu ban hasi uso di tur lokual ta sabiduria di nos grandinan tokante bienestar (herensia kultural tantu tangibel komo intangibel), pa asina nos por mantené e kustumbernan i alabes salbaguardiá nan di forma ku por hasi traspaso na generashonnan ku ta bini. Tambe nos ta mantené asina nos kultura bibu.
Durante di e siman ta bai pone énfasis riba e kombinashon di Kultura i Salú di hende. Esaki ta hiba nos na bienestar di e hende. Bienestar general ta un tópiko masha importante i relevante pa hopi tempu kaba. E mester bira pa nos un forma di biba (“way of life”/lifestyle) huntu ku su norma- i balornan. E intenshon ta pa stimulá pueblo di Kòrsou pa ban traha riba un kultura di bienestar pa medio di siña tantu e mucha komo adulto kon for di edat yòn por kuida nan mes. Asina preparando nan pa hiba un bida salú bou di tur sirkunstansia i bira mas konsiente di tur e diferente formanan ku ta kontribuí na un bida mas salú.
P’esei lo bai enfoká riba 6 dimenshon ku ta: Bienestar i salú físiko, Bienestar i salú sosial, Bienestar i salú intelektual, Bienestar i salú spiritual, Bienestar i salú emoshonal i Bienestar i salú profeshonal. Den e anekso por tuma nota di nifikashon di kada un di e dimenshonnan. Deskripshon di e lema: Deskripshon Siman di Kultura 2021
Na mes momento ta informá komunidat ku tin t-shirt ku e lema di Siman di Kultura na benta pa fl. 15.00, optenibel na JCC (Groot Kwartier), ofisina di SIFMA, ofisina di FDDK i ofisina di SEFBA. Por tuma kontakto tambe via di e-mail adrès saluibienestar@gmail.com òf por manda app na number +599 9 562-8888 pa mas informashon tokante e aktividatnan.
