Publiká riba 25 Òktober 2017
Willemstad – Djamars, 24 di òktober Minister Zita Jesus- Leito huntu ku un tim multi-disiplinario tabata presente na e sitio temporal pa warda vürwèrk na Brievengat. E tim aki ta konsistí di Douane, BAB, MEO, SOAB, OW, Brantwer i KPC.
E tim aki a ehersé trabounan di kòntròl en general riba e tereno i di kònteinernan. Tambe a atendé ku atministrashon di tur kònteiner ku tabata tei kaba, esnan ku a drenta awe, i lo kontrolá i atministrá esnan ku lo drenta den transkurso di e dianan ku ta bin. Tur esaki pa garantisá ku tur trabou ta sosodé na un manera seif i ordená.
Servisio pa Obra Públiko (OW) ta ehersé diferente trabou riba e tereno aki manera:
– ampliashon di e tereno pa por optimalisá e uso,
– ta drecha e tereno pa alsa e seguridat riba e tereno mes i den serkania,
– tambe lo ordená e kònteinernan ku ta kontené vürwèrk.
E trabounan aki tin un durashon di tres siman i e kontratista enkargá ku e trabounan ta Aliansa Civilroadswork.
Den transkurso di e siman aki lo sigui duna informashon via di medionan di komunikashon tokante e benta i almasenahe di vürwèrk mirando ku temporada di benta i shownan di vürwèrk ta serka. Gobièrnu di Kòrsou, atraves di e trabounan ya menshoná, ta hasi di su banda pa garantisá ku pueblo por disfrutá di vürwèrk na un manera seif, i ta hasi un apelashon na komunidat pa hasi uso konsiente di vürwèrk pa evitá insidentenan lamentabel.
Pa kualke pregunta tokante e proyekto por tuma kontakto ku Obra Públiko via e number 433-4237, Whats app +5999511-8582 òf via di e-mail info.vvrp@gobiernu.cw.
