Entrega di “The Backbone” na Minister S. Heydoorn

WILLEMSTAD – Minister di Enseñansa, Siensia, Kultura i Deporte (ESKD) sr. Sithree van Heydoorn ta risibí na su despacho sra. Migarda Martina, outor di e buki, ‘The Backbone’. E buki ta konta e historia di un mama ku a keda pasa den pruebanan difísil ku su yu. Sra. Migarda Martina ta mama di e hóben dinámiko Alton Paas ku a haña un aksidente i a keda leshoná (spinal cord injury).

E situashon tabata tin konsekuensia pa henter e famia. Komo famia e tata i e mama mester a karga e kas huntu i guia e yunan den e periodo aki. E tata ta simbolisá e kabes di kas i e mama ta simbolisá e wes’i lomba (Backbone) di e famia.

P’esei e buki ta konta e historia for di e perspektiva di e Muhé ku ta e wes’i lomba di e famia. For di e buki tin un historia real i bunita kaminda e mama mester a sostené su yu den e trayekto di rekuperashon i pa enfrenta bida di un otro forma, pero ku kurashi i fe tantu aki na Kòrsou i internashonal e famia ta logra mustra ku apesar di e situashon difisil ku bida ta kontinua i ku soñonan di Alton ta bira realidat.

Minister Sithree van Heydoorn a keda sumamente kontentu ku e bishita i tin sigur ku e buki ta inspirashon pa henter komunidat di Kòrsou.Pa mas informashon di e buki por bishitá: https://migardamartina.com/

*******

**Riba e potrèt por tuma nota na momentu ku sra. Migarda Martina a hasi un entrega di un ehemplar na Minister sr. Sithree van Heydoorn.

MAS NOTISIA

Ministerio konserní: Enseñansa, Siensia, Kultura & Deporte