Publiká riba 22 Yüni 2023
Willemstad- Di dos dia di e bishita di trabou di Minister di Desaroyo Ekonómiko, Ruisandro Cijntje, na Brasil tambe tabata hopi fruktífero. Minister Cijntje i su delegashon a topa ku gerensia di CCR, un di e kompanianan di mas importante na Brasil i ku ta doño mayoritario di Curaçao Airport Partners, operadó di nos aeropuerto. CCR ta den e negoshi di infrastruktura di mobilidat ku invershonnan kuantioso den kareteranan na Brasil, liña di metro i tram den Sao Paulo, Rio i otro siudatnan i tambe vários aeropuerto. Nan ta manehá 20 aeropuerto, 17 den Brasil i 3 pafó di Brasil. Nan ta manehá aeropuerto di Quito, Costa Rica i na Kòrsou. Kòrsou su aeropuerto ta e promé pafó di 
Brasil. Despues a sigui e dos otronan. CCR tin un konseshon di 30 aña ku Curaçao Airport Holding di kua 20 aña a pasa kaba. E bishita di Minister Cijntje tabata pa sera konosí ku e gerensia nobo di CCR. E kompania tin plannan grandi i ta sigui ekspandé nan negoshi i a presentá nan vishon i plannan pa futuro. Na ougùstùs e gerensia lo ta na Kòrsou pa papia ku gerensia di CAH i Gobièrnu tokante futuro.
Durante e di dos dia, Minister Cijntje a partisipá na lansamentu di Gabi Weekend, un evento di e artista i influencer Brazilero Gabi Lopez ku ta biaha den grupo i organisá su kumpleaño ku amigunan i fanátikonan na un lugá ku e skohe. E aña aki el a skohe Kòrsou. Di 6 pa 11 di ougùstùs 2023, Gabi lo selebrá Gabi Weekend na Kòrsou! CTB, Copa Airlines i vários otro kompania ta sostené e evento i ta spera mas di 250 partisipante for di Brasil. Gabi Weekend lo trese hopi ‘influencers’ di Brasil, artistanan i empresarionan pa gosa i pasa un bon tempu na Kòrsou. Minister Cijntje a invitá tur presente na e lansamentu pa bin Kòrsou. “Boa Noite, un prazer estar aqui com voçes. Estou ancioso para receber voçes en Curaçao”, Minister Cijntje a dal e na Portugues. Despues a sigui aplouso i entusiasmo di esnan presente. 
Gabi weekend ta ilustrá e forma moderno i inovativo pa hasi promoshon. Miónes di siguidó lo sigui e biahe i mas di 15 artista Brasileño lo biaha i lo hasi presentashonnan na Kòrsou. Lo tin dos artista di Kòrsou komo elenko di Gabi Weekend. Tyzik i Woody tambe lo ta artistanan ku lo presentá durante Gabi Weekend na Kòrsou. Ámbos artista ta masha konosí na Brasil i ta konkistando e merkado gigante aki. Woody ta di orígen Brasileño pero a lanta na Kòrsou i awor ta biba un tempu na Brasil i tambe na Kòrsou. Tyzik ta konosí di NSTYPLY i ta traha na Kòrsou i Hulanda i e tambe ta konkistando e merkado Brasileño. Un ehèmpel kon sektor kreativo ta kombiná ku turismo komo un pakete.
Tantu Minister Cijntje, komo Ofisina di Turismo i Partnernan ta komprometé pa hiba nos Turismo na un siguiente nivel dor di kombiná ku otro sektornan manera sektor kreativo, finansiero i IT pa nombra algun. Kòrsou ta definitivamente e ‘hotspot’ pa Brasileronan den Karibe! E buelo di Azul ku lo inisiá djasabra 24 di yüni awor ta konfirmá esaki.
