“Mi ta komprometé pa hasi e sektor di ICT e di 4 pilá Ekonómiko di Kòrsou!”

Delegashon di Kòrsou partisipando na CANTO 2023

Minister Cijntje durante Mishon ku sektor di ICT! 

Willemstad- Di 16 pa 20 di yüli 2023, Minister di Desaroyo Ekonómiko, sr. Ruisandro Cijntje a liderá un delegashon di por lo menos 20 empresa den sektor di ICT for di Kòrsou na e di 38 edishon di e konferensha i eksibishon CANTO na Miami. Huntu ku minister Cijntje, Minister di Tráfiko, Transporte i Planifikashon Urbano, Sr. Charles Cooper, tambe a forma parti di e delegashon akí. E aña akí, CANTO a atraé mas di 600 partisipante di henter Karibe.
Kòrsou ta partisipá tur aña na e konferensha i eksibishon akí i tabata anfitrion pa CANTO na vários okashon. Pa nos pais, un konferensia di e taya akí ta un bon plataforma pa interkambio i pa hasi negoshi. Ministernan ta topa otro i desaroyá konekshonnan, reguladornan ta interkambiá di eksperensia i kompanianan di telekomunikashon ta presentá nan produktonan nobo, i for di e aña akí kompanianan di ICT tambe tei pa interaktuá i ofresé inovashon na sektor públiko i privá. 

Den Kòrsou su Strategia Nashonal di Eksportashon 2022-2027 (NES), un di e sektornan prominente pa yuda diversifiká i krese nos ekonomia ta netamente e sektor di ICT. Durante e  resepshon di bon biní pa e delegashon di Kòrsou i invitadonan di sobrá di Karibe durante e konferensha i eksibishon CANTO 2023, Minister Cijntje a primintí e sektor ku komo minister e lo ta komprometé pa hasi e sektor di ICT e di 4 pilá ekonómiko di Kòrsou. E kompromiso akí, a keda risibí di forma abrumador serka e empresarionan presente. Nan a ekspresá nan konfiansa den e proseso i ta bai traha skouder ku skouder ku Gobièrnu pa por logra e meta akí. 

Kòrsou ta bon posishoná pa liderá den Karibe ku Digital Hub Americas.
Kòrsou su Strategia Nashonal di Eksportashon ta aktualmente den fase di implementashon i pa e trabounan di implementashon den e sektor di ICT, e sektor a desaroyá Digital Hub Americas. Digital Hub Americas ta un plataforma pa sentralisá tur Kòrsou su proveedornan di servisionan di ICT pa kolaborá i posishoná Kòrsou komo un hub digital. Tin un potensial enorme i dor di tin vishon i determinashon nos ta logra kana padilanti. Na e edishon anterior di CANTO, Minister Cooper a mustra ku e tabata sinti falta di e komponente di ICT den CANTO; kual ta hopi riba telekomunikashon so i ku e ke mira empresanan di ICT i temanan riba ICT mas prominente den e programa di e konferensia i e ekshibishon. E aña akí nos a bin ku Digital Hub Americas, ku ta konsistí di e empresanan di ICT. Durante di e apertura ofisial di e konferensha i eksibishon akí, Sra. Teresa Wankin (Sekretario General di CANTO) a referí na e promesa di Minister Cooper i a elogiá e Minister i Kòrsou pa e liderazgo. 

Digital Hub Americas
Digital Hub Americas (DHA) ta un inisiativa di Blue Nap Americas i tambe Bureau Telecommunicatie & Post (BTP) ku sosten di e.o. Cinex, CIFC, Simia i Kámara di Komersio. Komo plataforma, DHA ta fasilitá e interakshon entre empresanan ku ta aktivo den e ekosistema di ekonomia digital pa ofresé servisionan komersial i profeshonal na gobièrnunan i sektor privá den hemisferio oksidental. E interakshon aki ta kondusí na: 

• Desaroyo di produktonan i servisionan nobo pa por ofresé mihó servisio na komunidat i klientenan. 
• Deskubrimentu di desaroyadó nan i kompanianan ku por krea e produktonan i servisionan nobo aki.
• Sali na interes di kambionan nesesario pa mehorá e abilidatnan di miembronan di DHA pa proveé nan servisionan riba merkado internashonal.

Via DHA Kòrsou, lo keda posishoná komo un hub digital ku ta konektá lokalmente i ta entregá mundialmente, co-create locally and deliver globally. Bishitá https://www.digitalhubamericas.com pa mas detaye. Pa e Strategia di eksportashon por bishitá https://curacaoexport.org/curacao-national-export-strategy/. 

Ministernan di Karibe presente durante CANTO 2023

MAS NOTISIA

Ministerio konserní: Desaroyo Ekonómiko