Publiká riba 21 Yüni 2023
Willemstad- Den kuadro di e buelo inougural di Azul Airlines di djasabra 24 di yüni 2023, Minister Cijntje ta na Brasil pa un bishita di trabou huntu ku Ofisina di Turismo di Kòrsou i tambe Curaçao Airport Partners. E bishita ta den kuadro di e buelo inougural i desaroyonan na aeropuerto. E bishita a start riba e promé dia ku un bishita na e ofisina prinsipal di Azul Airlines na Sao Paulo. Minister Cijntje a reuní ku e Presidente di Azul Airlines John Rodgerson. Sr. Rodgerson a ekspresá su satisfakshon pa e ruta nobo ku e Aerolínea ku e ta presidí ta bai inisiá. Sr. Rodgerson konosé Kòrsou i e potensial ku Kòrsou tin pa bira un di e destinashonnan prominente di Azul Airlines pafó di Brasil. “Curaçao is a great destination”, John Rodgerson a duna di konosé. Kòrsou ta e promé destinashon den Karibe pa Azul. Sr. Rodgerson a sigui splika ku 22 aña pasá el a pasa su luna de miel na Kòrsou i e ta kòrda kon dushi i relahante el a pasa, el a snòrkel i keiru hopi i a keda ku rekuerdonan memorabel di su biahe. Ademas el a bisa ku Brasileronan ta un tremendo turista pa bo tin den bo merkado. Brasileronan gusta shòp i ta gasta hopi sèn. El a indiká ku mester keda invertí den promoshon di e destinashon. Minister Cijntje a indiká ku esaki sigur lo ta e kaso i ku Ofisina di Turismo lo sòru pa e komunikashon i promoshon den e segmentonan di merkado kaminda nos sa di yega serka e Brasileño.
Minister Cijntje a hasi un rekorido den e ofisina prinsipal di Azul ku tin mas di 1.000 empleado i su sentro di operashon ta un di esnan mas moderno i avansá. E tim di Azul ta entusiasmá pa e buelo, i mirando ku nan promé buelo pa Karibe nan ke pa e ta eksitoso. “Ya kaba nos ta mira ku dor di e promoshon promé ku inisio di e buelo ya tin buelonan yen i si sigui asina pronto nos lo agregá nos di dos buelo e Direktor General Network & Strategic Planning, Vitor Silva a indiká i “si nos sigui asina den dos aña nos por yega na buelo diario”. Tin hopi potensial pa Azul dor di e ruta nobo aki i ku por wak kon por agregá mas destinashon den futuro.
Mas anochi tabatin un enkuentro ku prensa di Sao Paulo pa sigui promové i posishoná e buelo inougural. Ora representante di CTB na Brasil, Janaina de Aroujo a hasi kontakto ku Vitor Silva di Azul pa proponé e posibilidat di buelo direkto, e ekiponan di ámbos banda a kuminsá traha i 9 luna despues e buelo a mira lus di dia. CTB i Curaçao Airport Partners a traha huntu ku Azul pa logra e buelo aki. Jonny Andersen, CEO di CAP, di orígen Norwechi, a konfirmá na tur presente ku Kòrsou ta un destinashon bale la pena bishitá. E ta privilegiá di biba na Kòrsou, kaminda nan ta bin di vakashon! Minister Cijntje a konta e presentenan kon interesante i bunita Kòrsou ta, i el a gradisí Azul pa kere den Kòrsou i a reta pa denter di un aña bai na buelo diario!
Promé destinashon di Azul den Karibe
E buelo pa Kòrsou aki, ta promé bia ku Azul ta bula pa un destinashon den Karibe. “Esaki ta yena nos ku hopi orguyo”, Minister Cijntje ta indiká. E buelo ta trese tambe kompetensia i e otro aerolíneanan manera Avianca i Copa Airlines a subi nan promoshon i ta ofresé preisnan mas kompetitivo pa kapta atenshon di potensial turistanan. Hugo Clarinda di CTB ta indiká ku ya kaba, turismo for di Brasil a oumentá ku 100% pa loke ta e promé 5 lunanan di 2023 i ku e buelo di Azul aki nos ta premirá un eksploshon di bishitante for di Brasil. Minster Cijntje ta mustra ku oportunidatnan ta habri asina pa nos empresarionan ku ta den e área di shopping, prinsipalmente paña artefaktonan di markanan internashonal ku na Brasil ta muchu karu, diving i tambe e parti kulinario tin un merkado interesante pa cater na dje i e ta hasi un yamada pa organisá nan mes i ofresé e eksperensia na e turista Brasileño. Kòrsou ta kresiendo i ta ampliando su kantidat di kamber i esaki ta un posishon faborabel pa e ta aden. Ademas e vínkulo históriko ku Brasil i nos idioma ku ta laga e Brasileño sintié 
na kas, ta hasi ku nos por konta ku e atenshon i kompromiso di e biahero i aerolínea Brasileño.
Riba e buelo inougural lo tei, banda di e delegashon di Kòrsou enkabesá pa Minister Cijntje, tambe funshonarionan di Gobièrnu di Minas Gerais, direktornan di Azul i tambe di entidatnan di invershon i komersio di Minas Gerais, e estado den kua Belo Horizonte ta e kapital. Lo tin tambe 17 periodista ku lo sòru pa kubri e destinashon ku reportahenan. E buelo lo yega den kareda di 18:00 djasabra atardi i e lo keda bulá pa e Crew ku resientemente a gana e premio estelar Excellence Award ku Azul ta otorgá tur aña na su mihó pilotonan i personal di kabina. E avion ku Azul a pone riba e ruta ta un Airbus 320 moderno ku Wifi na bordo, live t.v. i un bon oferta di pelíkulanan pa deleitá e biahero. E buelonan di Azul lo yega 6or di atardi final riba djasabra i lo sali di regreso pa Belo Horizonte riba djadumingu 9’or di mainta. E Crew lo keda den un hotèl den sentro di siudat i asina nan lo sosegá i disfrutá un poko di loke nos Willemstad tin di ofresé. E biahero brasilero ta keda por lo general mas o ménos 1 siman! Nos hotèlnan na Kòrsou a kolaborá bon ku e promoshon dor di ofresé tarifanan spesial, i a krea paketenan atraktivo i a hasi hopi promoshon huntu ku Azul. Aki tin un oportunidat di oro pa Belo Horizonte bira e Medellín di Brasil, asina Peggy Croes di Curaçao Airport Partners a kompartí. CAP ke garantisá ku e buelonan ta bai bek ku yunan di Kòrsou òf otro turistanan ku ta bishita Belo Horizonte i ta subi e potensial di e buelonan di Azul. Lo promové Belo Horizonte na Kòrsou komo e siguiente destinashon ‘hot’ di momento. Mas pasahero lo por ekspandé den mas buelo, pues nos mester hinka sufisiente invershon den merkadeo, pero tambe garantisá ku nos destinashon por krea un eksperensia úniko” Minister Cijntje a ilustrá.
‘Spinoff’ pa Kòrsou
E buelo di Azul Airlines aki ta krea hopi oportunidat, banda di Turismo e ta trese tambe komersio, invershon i te hasta oportunidatnan pa koperá ku Aerolíneanan establesé na Kòrsou pa hunga un ròl den transporte pa otro destinashonnan den Karibe. Banda di esei e posibilidatnan pa konektá Kòrsou ku barkunan krusero, i pone avionnan pa transporte di karga tambe ta parti di e potensial ‘spin-off’ pa Kòrsou.
Tokante Azul i Belo Horizonte
Azul Linhas Aéreas Brasileiras S/A ta un aerolínea establesé na Brasil den e estado di Sao Paulo. E modelo di negoshi di Azul ta pa stimulá demanda dor di krea servisio aéreo frekuente i na preis kompetitivo den merkadonan ku no ta haña atenshon. E fundadó ta e merikano David Neeleman, ku tambe a funda e aerolínea merikano Jet Blue. Azul a keda lantá na 2008. Banda di operá un aerolínea Azul tin su mes agensia di biahe, ku ta krea e oportunidatnan den kas mes.
Belo Horizonte ta e siudat kapital di Minas Gerais. E siudat ta rondoná di seru i ta kas di e stadion Mineirão i di e museo di futbòl di Brasil. Serka tin e lago Pampulha i e sentro arkitektóniko Pampulha, i e iglesia di Fransisco di Asisi diseñá pa e arkitekto di modernismo Oscar Niemeyer. Belo Horizonte tin un poblashon di 2.7 mion habitante. Azul ta uza e aeropuerto Confins komo un hub pa trese e biaheronan di vários parti di Brasil, prinsipalmente Sao Paulo i áreanan serka, pa nan subi e buelo di Azul ku ta sali 13.00 ora lokal. Brasil ta un ora mas dilanti ku Kòrsou. Azul ta e aerolínea di mas grandi di Brasil.
