Publiká riba 14 Yüli 2023
Willemstad- Nos playanan sin duda ta forma un parti esensial den promoshon di nos pais komo destinashon turístiko. Den un sondeo resien di Curaçao Tourist Board (CTB) bou di turistanan di estadia, nos playanan a sali number 1 den e tòp 5 di aktividatnan mas bishitá na Kòrsou. Pues netamente mirando e importansia i impakto aki di nos playanan den nos produkto turístiko, Minister di Desaroyo Ekonómiko, señor Ruisandro Cijntje, a bin ta forma parti aktivamente den un grupo di trabou interministerial ku a keda inisiá na aña 2021 ku e meta pa traha i implementá diferente plan di desaroyá (‘grade up’) i hasi mantenshon na 8 playa públiko (di e total di 34 playanan públiko) na Kòrsou ku ta hopi bishitá pa turistanan. Ta trata aki di playanan Caracasbaai, Jeremy, Lagun, Playa Fòrti, Kenepa Grandi, Kenepa Chikí, Daaibooi i Sta Cruz. Mas ku klaro e trabounan di desaroyo i mantenshon na e 8 playanan aki lo a benefisiá no solamente e turistanan ku ta bishitá nos pais, pero tambe nos hendenan lokal ku ta disfrutá di e playanan aki ku frekuensia i interkambiá den forma ameno ku nos turistanan.
A formulá un plan kaminda den un periodo di 4 aña lo mester logra ehekutá i finalisá e trabounan di desaroyo i mantenshon na e playanan akí. Den e promé aña lo a ehekutá proyektonan chikitu pa drecha fasilidatnan básiko na Playa di Caracasbaai, Jeremy, Lagun i Playa Fòrti i kuminsá ku e preparashonnan pa trabounan di mas grandi pa desaroyá (‘grade up’) Kenepa Grandi, Kenepa Chikí, Daaibooi i Playa Sta Cruz. Segun un presupuesto global, e proyekto lo a kosta alrededor di 25.5 mion florin.
Pa e ehekushon di e proyekto aki por a kana mas efisiente posibel, Minister Cijntje a pone den aña 2023, 2.5 mion di su ministerio disponibel. Banda di esei el a suprayá e kondishon imperativo pa sera un akuerdo di atministrashon (beheersovereenkomst) ku CTB, konforme un desishon di Konseho di Minister fechá 6 di aprel 2022, pa asina CTB por kordiná e ehekushon di e plannan di desaroyo. Den e desishon di Konseho di Minister, CTB a keda skohé komo e mihó opshon pa fungi komo atministradó (beheerder) i asina garantisá ku Gobièrnu ta duna prioridat na e kompromiso pa desaroyá, mehorá i mantené e 8 playanan públiko segun e plannan formulá. Durante e añanan tras di lomba te ku awor, CTB a akumulá hopi eksperensia den ehekushon i atministrashon di proyektonan di desaroyo di áreanan turístiko manera entre otro na Marie Pampoen.
Minister Cijntje a mustra pa medio di un karta resientemente na Ministerio di Salubridat Públiko, Medio Ambiente i Naturalesa (GMN) e urgensia i importansia pa logra ehekutá e plannan di desaroyo i mantenshon di e 8 playanan ku tin añanan sin haña debido atenshon mirando e impakto ku e kalidat di e playanan aki tin riba nos produkto turístiko i nos komunidat en general. Den e karta a urgi pa aprobá e plan i su finansiamentu i tambe firma e akuerdo di atministrashon (beheersovereenkomst) ku CTB pa e trabounan por a kuminsá. Ministerio di GMN sinembargo a skohe pa laga un departamentu di e ministerio mes atendé ku e ehekushon di e plan di desaroyo i mantenshon di e 8 playanan ariba menshoná, kual semper tabata resortá bou di e ministerio di GMN su responsabilidat pero lamentablemente no a haña prioridat.
Pues pa tur transparensia: Minister Cijntje i CTB no ta enkargá ku e playanan.
