Minister di ESKD ta negoshá ku UCF

Minister Sithree van Heydoorn ta den negosashon ku Universidat Sentral na Florida (UCF)

WILLEMSTAD – Minister Sithree van Heydoorn den representashon di Ministerio di Enseñansa, Siensia, Kultura i Deporte (ESKD) ta kontinuá ku su mishon pa realisá finansiamentu di estudio pa nos studiantenan na un preis rasonabel di manera ku ora nos studiantenan kaba nan estudio nan lo no tin un debe astronómiko. Manera ya a keda informá a firma un akuerdo ku University òf West Florida riba djaluna 5 yüni 2023. Djamars 6 di yüni, Minister van Heydoorn a reuní ku University of Central Florida (UCF) kaminda tabata presente, Vise-presidente di UCF global sra. Nataly Chandia, direktor di UCF global sr. Mark Hartman i dr. Robertico “Tico” Croes dosente na UCF i Rosen College. Meta di e enkuentro aki tambe tabata pa logra ku pa e aña akadémiko 2024/25 nos studiantenan por risibí “ Instate Tuition “.

Den e reunion minister a duna UCF un bista dikon ta importante pa studia den region i kiko presis komo Kòrsou ke logra den futuro. A yega na palabrashon ku den e siguiente lunanan ta sigui den kòmbersashon i ku pa mas tarda den e promé siman di desèmber 2023, ta firma un akuerdo (MoU) ku lo drenta na vigor den e aña akadémiko 2024/2025. Ala bes minister a reuní ku, “Assistant Dean of Research” di Rosen College, sr. Manuel Rivera i dr. Robertico “Tico” Croes, pa eksplorá un posibel kooperashon entre nos i e instituto menshoná. Sr. Rivera konosé Kòrsou hopi bon, pa motibu ku e la hasi hopi investigashon den pasado pa nos pais. A palabrá ku nan tambe ta hasi tur loke ta posibel pa nos studiantenan haña sufisiente posibilidat pa bin studia na UCF ku kondishonnan faborabel di pago.

Loke tambe Minister Sithree van Heydoorn a palabrá ku UCF ku den un futuro hopi serkano ta bai kolaborá ku Universidat di Kòrsou (UoC) pa loke ta trata interkambio di studiante, posibilidat pa stazje i tambe programanan di interkambio pa dosentenan relashoná ku e aspektonan akadémiko i profeshonal. Minister Sithree van Heydoorn ta garantisá ku e relashon ku UCF lo duna nos studiantenan di Stichting Studiefinanciering Curaçao (SSC) benefisionan positivo, ku ta hopi importante pa desaroyo di nos Dushi Kòrsou. E tipo di akuerdonan aki ta di hopi importansia spesialmente pa nos hóbennan.

Asina Minister Sithree van Heydoorn enkargá ku enseñansa huntu ku ministerio di ESKD ta sigui traha na fabor di nos hóbennan.

—
Sithree van Heydoorn
Minister di Enseñansa, Siensia, Kultura i Deporte

** Riba e potrèt athunto ariba por tuma nota di tur persona presente na e reunion na Universidat Sentral na Florida.

MAS NOTISIA

Ministerio konserní: Enseñansa, Siensia, Kultura & Deporte