Petishon pa drecha skolnan a keda hasí

Petishon pa drecha e promé 3 skolnan a keda hasí den kuadro di Proyekto Mantenshon di Skolnan

WILLEMSTAD – Den kuadro di e proyekto di mantenshon di edifisionan di skolnan, Minister di Enseñansa, Siensia, Kultura i Deporte (ESKD) sr. Sithree van Heydoorn ta informá ku e petishon pa e promé parti pa e finansiamentu pa drecha i hasi mantenshon di e skolnan a keda hasí.

Den konsulta ku e direktivanan di e skolnan i profeshonalnan tékniko a prepará tur e dokumentonan nesesario, ku a keda entregá huntu ku e petishon na Sekretario di Estado sra. A.C. van Huffelen na Ministerio di ‘Binnenlandse Zaken en Koninkrijkrelaties’ (BZK). E petishon ta relashoná ku e promé 3 skolnan di e lista di 12 nan ku lo keda drechá. E skolnan ta Kolegio Erasmo, skol di fundeshi Nelly Winkel i skol di fundeshi Cola Debrot.

Ministerio di ESKD a risibí kontesta kaba di ámtenar di BZK, ku nan a risibí e petishon huntu ku e dokumentonan korespondiente i ku nan lo traha mesora riba esaki. Na momentu ku e petishon keda aprobá i Gobièrnu haña e promé parti di 30 mion Euro, ku ta un suma ekivalente na Naf. 6,7088.86, ta start ku e trayekto di ehekushon a korto plaso. Esaki ta bin di e fondonan di 30 mion euro ku Hulanda a reservá i a sali for di e akuerdo entre Kòrsou i Hulanda den kuadro di ‘Landenpakket’.

Minister enkargá ku Enseñansa sr. Sithree van Heydoorn ta mustra riba echo ku ta kanando konforme e palabrashonnan hasí pa asina por drecha e edifisionan di e skolnan. Ministerio di ESKD  bou di enkargo di Minister ta sigui traha huntu ku tur e organisashonnan envolví, pa drecha nos enseñansa pa asina nos muchanan, por tin un mihó trayekto eskolar pa nan por desaroyá i alkansá nan máksimo potensial komo un siudadano ehemplar.

—

Sr. Sithree van Heydoorn

Minister di Enseñansa, Siensia, Kultura i Deporte

MAS NOTISIA

Ministerio konserní: Enseñansa, Siensia, Kultura & Deporte