Trayekto Agente di Lus - Informashon tokante Gobièrnu di Kòrsou

Trayekto Agente di Lus

Ministerio konserní Enseñansa, Siensia, Kultura & Deporte
 

Trayekto Agente di Lus

Publiká riba 21 Yüli 2023

WILLEMSTAD – Ministerio di Enseñansa, Siensia, Kultura i Deporte (ESKD) den estrecho koperashon ku Fundashon Museo Kas di Pal’i Maishi a tene un kurso relashoná ku e trayekto Agente di lus. Esaki ta enfoká riba historia di Kòrsou for di e perspektiva di de-kolonisashon. Den anfiteatro na Otrabanda Minister sr. Sithree van Heydoorn den presensia di Direktor di Kultura i Deporte sra. Lizette Sambo – Velder i sra. Jeanne Henriques huntu a partisipá na un di e aktividatnan di e trayekto aki. E kurso ta siña e partisipante di nos historia i nos presente di manera ku bo por prepará mihó pa futuro. Temanan ku a keda presentá ta: Kontinente Afrikano, Resistensia den Karibe i na Kòrsou, Rebelion den Karibe i na Kòrsou, Ekonomia den tempu di Sklabitut, nos Indignonan i hopi mas.

Tambe e organisashon a hasi entrega di material edukativo (lesbrief) relashoná ku Abolishon di Sklabitut ku sra. Shulaika (Sue) Girigorie a traha. Sra. Girigorie den felis memoria nos ta rekord’é komo e antropólogo ku tabata guia i eduká nos komunidat den vários área kultural pero spesialmente den e ramo di herensia kultural tangibel i intangibel. E material aki a keda entregá na Minister di ESKD pa sigui ku e produkshon i distribushon di nos historia relashoná ku Abolishon di Sklabitut.

Minister enkargá ku kultura ta felisitá Museo Kas di Pal’i Maishi i yama kada agente di lus danki pa e interes ku nan tin den nos historia i tambe ta elogiá e deseo di kada un di nan pa sigui informá komunidat di nos herensia.


KOMUNIKASHON
** Riba e potrètnan athunto por tuma nota di e aktividat.