Tula: Luchadó i Inspiradó

Tula: Luchadó pa Libertat, Iguadat i Fraternidat ta keda inspirá nos pa sigui konstruí nos nashon ku balentia i kurashi.

WILLEMSTAD – Minister di Enseñansa, Siensia, Kultura i Deporte (ESDK) sr. Sithree van Heyoorn a risibí bishita di sr. Charles Do Rego. Den presensia di direktor di Sektor di Kultura i Deporte sra. Lizette Sambo-Velder i koleganan di gabinete, sr. Charles Do Rego a hasi entrega di e buki: “Tula: Luchadó i Inspiradó” na Minister.

Sr. Charles Do Rego komo historiadó a hasi vários investigashon relashoná ku sklabitut i sigur relashoná ku e lucha di 1795. E buki ta un kompilashon di diferente artíkulo ku ta splika na un manera simpel e rebelion di katibu konforme e konteksto históriko. Alabes por tuma nota di tur e momentunan di siglo 18, kaminda e balornan universal di un luchadó ta keda deskribí. Tambe den e artikulonan por tuma nota di e inspirashon pa ku liderazgo di e luchadó Tula. Tur e informashon den e buki a keda redaktá pa Archivo Nashonal di Kòrsou i finansiá pa Museo Mongui Maduro i Plataforma Sklabitut Herensia di Sklabitut.

Minister di ESKD sr. Sithree van Heydoorn a keda sumamente kontentu ku e bishita i a gradisí sr. Charles Do Rego di a kompartí tur e informashonnan balioso relatá na nos historia. Alabes minister ta rekomendá puebli di Kòrsou pa lesa i tuma bon nota di e buki, Tula: ‘Luchadó i Inspiradó’.

—
KOMUNIKASHON

Pa mas potrèt bishitá: Buki Tula: Luchadó i Inspiradó

MAS NOTISIA

Ministerio konserní: Enseñansa, Siensia, Kultura & Deporte