Publiká riba 01 Desèmber 2020
Willemstad – Pueblo di Kòrsou a ekspresá nan preokupashon na momentu ku a traha un rampa na Playa Kenepa Grandi. Minister Jesus-Leito a skucha e yamada aki, a laga para e trabounan, a laga hasi un investigashon i pidi konseho tokante esaki. A base di konsehonan risibí di diferente departamentu, Gobièrnu di Kòrsou siman pasá a tuma e desishon pa desmantela e rampa na Playa Kenepa Grandi.
Servisio pa Planifikashon Urbano, Servisio Meteorológiko Kòrsou, Domeinbeheer, Servisio Agrario i di Peska di Ministerio di Salubridat, Medio Ambiente i Naturalesa (GMN), i un büró di arkitekto eksperto eksterno a duna konseho koherente. Liña kòrá den e konsehonan ta ku e rampa den konstrukshon no ta kumpli ku diferente puntonan básiko di diseño i konstrukshon, manera entre otro:
Tambe mester tene kuenta ku e posibel peligernan pa aksidente i insidente di un rampa den konstrukshon bandoná den un area públiko.
E puntonan aki a duna minister Zita Jesus Leito i tambe Konesho di Minister sufisiente motibu pa duna e enkargo mesora pa kuminsa e trayekto pa plania i ehekutá desmantelashon di e konstrukshon. E planifikashon di e desmantelashon lo sosode den estrecho koperashon entre e organisashonnan envolví di gobièrnu i Curaçao Tourist Board (CTB), ku tin e guia general den esaki.
Na momento ku desmantelá e konstrukshon lo sòru pa esaki sosodé na un manera kuidadoso i kaminda esaki ta posibel, warda tur materialnan kitá ku e meta pa usa nan bèk den otro proyektonan.
Miéntras tantu e investigashon prosedural interno ta kontinuá pa wak kon e proseso a kana i kon por evitá esaki den futuro.
Minister Jesus-Leito ta enfatisá ku e aksesibilidat na e playa pa esnan ménos movibel ta importante. Pa e motibu aki, a duna e enkargo na un büró di arkitekto eksterno pa bini ku un diseño alternativo ku ta tene kuenta ku tur e konsehonan konserní i tambe lo sigui den deliberashon ekstenso ku e diferente gruponan representante. Na momentu ku tin mas avanse, lo bolbe informá komunidat. Lo perkurá pa kualke trabou den futuro tuma luga na un manera bon deliniá i organisá.