Kondekorashon Real

Un Kondekorashon Real ta un distinshon ku Rei ta duna. E distinshon aki ta ser otorgá na siudadanonan den Reino ku a hasi òf ta aportá di un forma eksepshonal na bienestar di nos komunidat òf di un grupo den nos komunidat.

Den Reino tin alrededor di 100 tipo di Kondekorashon Real. For di kondekorashon pa persona ku a sirbi den guera, te na esnan ku a hasi un trabou boluntario den nan komunidat pa tempu largu. Na Kòrsou, nos konosé 2 kategoria ku ta bini mas frekuente pa otorgá un kondekorashon:

Esakinan ta Orde van Oranje-Nassau i Orde van de Nederlandse Leeuw

• Kategoria Orde van Oranje-Nassau
  Pa bini na remarke pa e kategoria di Oranje -Nassau, e enfoke ta riba personanan ku a hasi trabou boluntario òf personanan ku banda di nan trabou a ekselá asina tantu ku nan ta bini na remarke. Den e kategorianan tin rango di Lid, Ridder, Officier, Commandeur, Groot Oficier i Ridder Groot Kruis.
• Kategoria Nederlandse Leeuw
  E kategoria di Nederlandse Leeuw ta un distinshon ku tin mas di haber ku entre otro deporte i kultura. Den e kategorianan tin rango di Lid, Ridder i Officier.

E persona ku por bin na remarke pa un nominashon pa un Kondekorashon Real ta un siudadano ku a bin ta hasi esfuersonan inkansabel pa mehorá bida di su próhimo. Por ehèmpel:

• Un hende ku ta traha trabou boluntario (sin pago)
• E mester ta òf a hasi esaki pa mas ku 15 aña
• Ta traha un promedio di 6 ora pa siman na e trabou boluntario
• Un persona ku banda di su trabou diario a bin ta hasi un esfuerso ekstraordinario i eksepshonal den su karera
• E mester keda postulá dor di 1 persona i sostené dor di mínimo 2 persona. (Un sosten por eskrito di mínimo mitar A4)

Nominá ta nifiká ora e persona ku abo a postulá a pasa den un proseso di e skrutiño dor di e Komishon Lokal i e persona ta keda presentá na final na e Komishon di kanselarij na Hulanda.

Tur hende tin te ku 15 di sèptèmber 2023 pa postulá, esta proponé un kandidato.
Despues e komishon di Kondekorashon Real di Kòrsou ta :

• Analisá, skrutiná i duna un konseho tokante e kandidatonan na Konseho di Minister.
• Konseho di Minister ta presentá esaki na Gobernador.
• Gobernador na su turno ta manda esaki pa Hulanda, pa e órgano di ‘Kapitel’, tambe un komishon, ta bolbe skrutiná e nominadonan konsiderando e konseho di Komishon di Kondekorashon Real.
• Al final ta presentá e kandidatonan na su Mahestat Rei ku ta afirmá e desishon pa kondekorashon den un dekreto di Reino.

Despues di proseso aki e kandidato ta haña un yamada di Gobernador i un invitashon pa tuma e kondekorashon durante un seremonia ofishal riba 26 di aprel 2024, ku ta e anochi promé ku fiesta di Rei (aña di Rei).

ABO komo siudadano, ku sa di un persona, ku inkansablemente ta traha trabou boluntario i ku ta kumpli ku e rekisitonan indiká, por hasi petishon pa un persona bin na remarke pa un nominashon. Kòrda si ku bo mester tin mínimo 2 persona pa sostené bo petishon i e tin ku keda un sorpresa pa e nominado na momento ku e pasa e proseso di skrutiño i por risibí e kondekorashon.

Pa postulá un persona, ‘download’ e formulario riba e página aki, yena i emití bo petishon na Bentana di Informashon na Saliña. Huntu ku e formulario mester entregá algun dokumento importante tambe. Banda di informashon di kontakto di e kandidato, e petishonario mester entregá informashon tokante trabou i dos otro persona ku ta afirmá pa medio di 2 mitar A4 e trabounan di e persona postulá.

Pa yena e formulario bo tin mester di tur dato di e persona i agregá tur e rekisitonan nesesario pa bo petishon ta bálido. Korda argumentá bo petishon bon. Mas mihó bo argumentá e motibu pa postulá e persona, mas mihó e proseso di skrutiño lo kana durante evaluashon.