Ta importante pa hasi un rekordatorio na pueblo ku Gobièrnu di Kòrsou, den kuadro di promové nos kultura riku i diverso, a dekretá aña 2019 komo e aña di piano di Silinder: Ka’i Òrgel. Pa kombiná e aspekto di bario huntu ku e enfoke di e aña aktual den Siman di Kultura e tema ta: Kòrsou ta e hende, E hende ta Kòrsou, i huntu nos ta alsa nos herensia kultural, entre nan, nos herensia musikal Ka’i Òrgel.
Gobièrnu di Kòrsou i Kas di Kultura ta hasi un yamada na tur famia, bario, radio emisora, kanal di televishon, skol, empresa gubernamental i privá, instituto, grupo kultural i artista pa kuminsá prepará pa Siman di Kultura 2019 enfokando riba nos herensia kultural tantu tangibel komo intangibel i di e forma aki biba nos lema di tur aña ku ta: Hasi grandi nos kultura i alsa nos nashon!
Ta rekordá tur persona, instansia, grupo i organishon pa manda nan programa di aktividat pa e tim di Siman di Kultura 2019. Esaki ta sali den e programa di aktividat di Kas di Kultura. Di e forma akí Kòrsou kompleto por keda na altura di e aktividatnan ku ta bai tin durante di Siman di Kultura 2019.
Manda bo programa promé ku dia 16 di Sèptèmber 2019 na: simandikultura2019@gmail.com i/o via di página di Facebook Fundashon Kas di Kultura. Pa kualke informashon por yama na 434-7355 òf konsultá e página di Facebook di Fundashon Kas di Kultura Kòrsou. Gobièrnu di Kòrsou i Kas di Kultura ta invitá henter komunidat di Kòrsou pa ban “Hasi Grandi nos Kultura i alsa nos Nashon”. Ban laga kultura di Kòrsou sigui brota den tur skina di Kòrsou durante di e Siman di Kultura.
—
Sra. Lisette Sambo-Velder
Direktor di Sektor di Kultura & Deporte
Ministerio di Enseñansa, Siensia, Kultura & Deporte
Pa ‘download’ e komunikado klik aki: Siman di Kultura 2019