WILLEMSTAD – A base di e konseho di biahe negativo ku a emití, Gobièrnu di Kòrsou ta úrgi tur hende ku ke biaha pa Venezuela pa no hasi esaki innesesario. E frontera marítimo i aéreo ku Aruba, Kòrsou i Boneiru ta será. No ta posibel pa biaha ku barku ni avion for di Venezuela pa e islanan i vice versa.
Na Venezuela tin demonstrashonnan ta tuma lugá ku por okashoná konfrontashon i violensia. Si bo ta na Venezuela kaba, evitá demonstrashonnan. E region di e fronteranan di Venezuela ku Colombia i Brasil ta peligroso. Esaki debí na protesta, blokeo di kareteranan, gruponan armá i retnan kriminal ku ta smòkel kontrabanda den besindario di e regionnan di e minanan. Tin biaha tin konfrontashon ku militarnan. No biaha pa e áreanan di e fronteranan ku Colombia i Brasil. Ni pa e parti sùit di e lago di Maracaibo ku tambe ta peligroso. Venezuela tin un eskases di remedi i kombustibel ta difísil pa haña.
E konseho akí ta basá riba e konseho ku ta konta pa Reino Ulandes. Por sigui esaki via https://www.nederlandwereldwijd.nl/r…/reisadviezen/venezuela
