Asistensha grandi na anochi di informashon relashoná ku proyekto Kunukito Hidropóniko - Informashon tokante Gobièrnu di Kòrsou

Notisia

Salubridat Públiko, Medio Ambiente i Naturalesa
 

Asistensha grandi na anochi di informashon relashoná ku proyekto Kunukito Hidropóniko

Publiká riba 22 Yüni 2018

Willemstad –  Minister di GMN mr. Suzanne Camelia- Römer resientemente a organisá tremendo anochi di informashon relashoná ku proyekto Kunukito Hidropóniko ku porsierto a konta ku un kantidat grandi di bishitante. E proyekto ta un koperashon entre Ministerio di GMN, ADECK i Universidad de la Guajira di Colombia. E proyekto ta ubiká riba tereno di AVB (ántes LVV) i ta enserá ku lo implementa 7 diferente téknika di produkshon agrario komo demostrashon pa tur esnan ku tin interes den agrikultura moderno. Minister Camelia- Römer a habri ofisialmente e nochi di informashon i lider di proyekto señor Doran mediante un presentashon a duna splikashon amplio di e proyekto i na final tabatin oportunidat pa públiko hasi pregunta.

Minister Camelia- Römer durante su presentashon a pone enfasis riba e 160 mion Florin ku nos ta importá na fruta i bèrdura anualmente i ku bon planifikashon nos por redusí esaki konsiderablemente. Minister a relashoná esaki tambe ku salubridat mustrando ku nos no sa tampoko ki sorto di supstanshanan otro paisnan ta uza durante produkshon di fruta i bèrdura. Alabes a indiká e diferente sektornan den Ministerio di GMN kaminda por invertí pa mehorá i fasilitá agrikultura i krio di bestia na Kòrsou. Relashoná ku nesesidat di tereno pa agrikultura, Minister a mustra ku maneho di gobièrnu pa algun tempu ta pa tuma bèk terenonan destiná pa agrikultura ku no ta den uzo pa duna esakinan na agrikultornan ku proyektonan konkreto kla pa inisiá.

Ya kaba hopi ta esnan ku a mustra interes p’e proyekto i pa partisipá na e diferente seshonnan. Lo trata plantamentu na kas i lo bini ku kursonan di agrikultura, kual ta proyektonan ku lo kuminsá e aña aki mes. Tambe lo duna mas informashon tokante benefisionan fiskal relashoná ku importashon di materialnan agrario i e benefisionan pa koperativanan ku ke hasi uzo di Fondo pa Agrikultura. Meta final ta pa logra seguridat alimentisio pa Kòrsou kual lo nifiká outomátikamente un salubridat i medio ambiente mas sano i kuponan di trabou duradero.   


 

1 Riba potrèt momentu di Minister Camelia- Römer su diskurso di apertura. Drpd; Gerritson Doran di AVB, Wilbert Geertruida di ADECK, Minister Camelia- Römer i direktor di sektor di agrikultura Gabriel Murray.

2 Riba potrèt un bista riba e sala ku tabata kompletamente yená ku personanan ku a mustra interes pa proyekto Kunukito Hidropóniko.

3 Riba potrèt momentu ku esnan presente por a hasi pregunta.

 

4 Riba potrèt momentu ku Minister Camelia- Römer ta respondé preguntanan di esnan presente.

                                                                        ###