Publiká riba 04 Sèptèmber 2017
Djabierne dia 16 di yüni 2017 Minister Zita Jesus-Leito di Ministerio di Tráfiko, Transporte i Planifikashon Urbano a klousura su bishitanan pa sera konosí ku tur e servisionan di su ministerio. E bishitanan básikamente tabata enserá sera konosí ku e organisashon mes den un forma mas profundo i tambe topa den un forma liber ku e personal.
Pa hiba un maneho strukturá i transparente minister i su kolaboradornan, huntu ku sekretario general señor Puriël i tambe direktor di sektor señora Manuel-Gonzalez a sinta ku e 7 direktornan huntu ku nan respektivo personal. Kada direktor a duna un splikashon ekstenso di loke su organisashon ta para pe i tambe e diferente puntonan di atenshon. E personal tambe a splika nan responsabilidat, tareanan diario i nan prekupashonnan den nan área di trabou.
Notabel ta ku tin un skarsedat grandi di personal den sierto funshonnan. Diferente trahadó a baha ku penshun loke ta hasi ku e trabounan a bira mas tantu pa esnan ku ainda tei. Konsekuensia di e situashon aki ta hiba na un servisio defisiente riba sierto tereno.
Minister a indiká ku e ta deseá di tin un kontakto hopi estrecho ku tur e organisashonnan i den algun di nan asta ku sierto departamentu spesífiko. E forma di aserkamentu aki ta duna Minister un bista amplio di loke ta tuma lugá den e ministerio den su totalidat pa e por stipulá prioridatnan abase di e diferente puntonan di atenshon. Minister a indiká kaba ku e ke pone enfasis riba e listanan di espera di Domeinbeheer, ROP (antes DROV) i tambe FKP.
Den e siman aki Minister lo bishitá tambe e diferente organisashonnan ku ta kai bou di e ministerio manera e.o. Bureau Telecommunicatie en Post (BTP), Auto Busbedrijf Curaçao (ABC), Fundashon Kas Popular (FKP), Cpost International (C-POST), United Telecommunication Services (UTS), Post Spaar Bank (PSB Bank), Dutch Caribbean Air Navigation Service Provider (DCANSP), Stichting Wegenfonds Curaçao (SWC) i Kadaster.
