Publiká riba 24 Ougùstùs 2017
Promé minister Eugene Rhuggenaath tabatin un enkuentro awe pa sera konosí ku e visepresidente di PDVSA na Venezuela, señor Guillermo Blanco i tambe e direktor nobo di Refineria Isla, señora Vanessa Flores.
E enkuentro entre e partidonan a tuma lugá den un ambiente ameno i positivo, i di tur banda a ekspresá e deseo pa despues di e terminashon di e kontrato di hür aktual na 2019 di un òf otro manera keda traha ku otro. Esaki den kuadro di e bon lasonan kultural i komersial ku ta eksistí entre e paísnan bisiña ya pa basta dekáda. Promé minister Rhuggenaath a duna di konosé ku e kontrato firmá ku GZE ta duna espasio pa embolbimentu di PDVSA.
Visepresidente di PDVSA Guillermo Blanco a konfirmá ku e relashon entre e paísnan i e refineria ta di sumo importansia pa Venezuela. A akordá ku riba termino kòrtiku lo plania un kombersashon entre Minister-president Rhuggenaath i su kolega Venezolano. Gobièrnu Venezolano lo krea un tim pa negosiá ku lo hiba kombersashon ku MDPT riba posibel partisipashon di PDVSA den futuro di nos refineria.
Tambe promé minister Rhuggenaath a interkambiá ku e direktor nobo di Isla señora Vanessa Flores riba kon por reforsá e relashon ku Isla, PDVSA i e gobièrnunan tin den próksimo añanan.
