Publiká riba 24 Novèmber 2022
Willemstad – Riba djaweps 24 di novèmber, Minister Charles Cooper a partisipá na e Reunion General di Akshonista (AVA) di Dutch Caribbean Air Navigation Service Provider N.V. (DC–ANSP).
Gobièrnu di Kòrsou ta akshonista di DC–ANSP, i Minister Cooper, komo Minister di Tráfiko, Transporte iPlanifikashon Urbano (VVRP) ta karga e responsabilidat pa DC–ANSP pa loke ta Kòrsou.
Banda di Gobièrnu di Kòrsou, tin 2 akshonista mas esta Sint Maarten i Hulanda. Minister di Infrastruktura i Maneho di Awa (I&W) Sr. Mark Halbers ta enkargá ku e parti di Hulanda, i Minister di Turismo, Asuntunan Ekonómiko, Transporte i Telekomunikashon di Sint Maarten, Sr. Otmar Ottley ta enkargá ku e reponsabilidat di Sint Maarten. Representante di e Minister di Hulanda tabata presente i representante di e Minister di Sint Maarten a partisipá via zoom.
DC–ANSP su tarea ta pa hasi kòntròl di tráfiko aereo den e espasio aereo di Kòrsou, i di e isla di Boneiru pa Hulanda.
Durante di e reunion, a trata diferente punto importante pa e organisashon, manera entre otro e “Businessplan” di DC-ANSP 2023-2027 i e Kuenta Anual 2021.
