Publiká riba 24 Novèmber 2023
Desishonnan relashoná spesífikamente ku asuntunan di pais riba nivel nashonal di djárason, 22 di novèmber 2023:
1. Proposishon di akshon pa ku e rapòrt ‘Niet doen is geen optie meer!’ i ‘QuickScans’ di Ministerionan – Fase 1 (Minister di Maneho di Gobernashon, Planifikashon i Servisio Públiko)
Konseho di Minister ta bai di akuerdo ku e siguiente desishonnan:
1. E rapòrt ‘Niets doen is geen optie meer!’ di 31 di òktober 2023 ta keda ofisialmente aprobá.
2. E rapòrtnan di QuickScans (fase I) di e nuebe ministerionan tokante kapítulonan 1, 2, 3 i 5 ta keda aprobá. Ta importante remarká ku por adaptá e tareanan prinsipal den fase II manera ta deskribí den kapítulo 3, si ta nesesario.
3. Lo usa informashon den kapítulo 4 di e rapòrtnan agregá den formulashon di e rapòrtnan nobo di organisashon i formashon pa kada ministerio.
Esaki ta basá riba e proposishon di 22 di novèmber 2023 di e Minister suplente di Maneho di Gobernashon, Planifikashon i Servisio Públiko i e petishonnan di 17 di novèmber 2023 di e mesun minister.
2. Proposishon pa finansiamentu di e programa ‘Verbeteren Functioneren Overheid’ (Minister di Maneho di Gobernashon, Planifikashon i Servisio Públiko)
Konseho di Minister ta bai di akuerdo ku e siguiente desishonnan:
1. A tuma nota di e splikashon tokante di presupuesto pa e programa ‘Verbeteren Functioneren Overheid’ (VFO) i kalkulashon di e ekonomisashonnan ku ta spera riba gastunan di gobièrnu.
2. E proposishon di finansiamentu di Minister di Maneho di Gobernashon, Planifikashon i Servisio Públiko (BPD) pa e programa VFO a keda aseptá. Huntu ku esaki Ministerio lo karga e gastunan di NAf 4,6 mion pa aña 2023. Pa e añanan 2024 (NAf 8.4 mion) i 2025 (NAf 7.4 mion) lo agregá rekursonan adishonal na e presupuesto di Ministerio di BPD, sea pa medio di servisionan kapital òf pa medio di un modifikashon den presupuesto.
Esaki ta konforme e proposishon di dia 17 di novèmber 2023 di Minister suplente di Maneho di Gobernashon, Planifikashon i Servisio Públiko, teniendo kuenta ku e konseho di 12 di òktober 2023 di Direktor di sektor di Maneho Finansiero i Maneho di Presupuesto.
3. Proposishon pa kolaborashon entre Kòrsou i ‘Vereniging Nederlandse Gemeenten (VNG) (Minister di Maneho di Gobernashon, Planifikashon i Servisio Públiko)
Konseho di Minister a bai di akuerdo ku e siguiente desishonnan:
1. Ta bai di akuerdo ku e idea di un kombenio di kolaborashon entre ‘Vereniging van Nederlandse Gemeenten (VNG)’ i Kòrsou’ manera ta deskribí den e konsepto agregá.
2. Ta duna pèrmit na Minister di Maneho di Gobernashon, Planifikashon i Servisio Públiko (BPD) pa firma e kombenio di kolaborashon den konsepto na nòmber di Kòrsou.
3. A tuma nota di e karta di 14 di ougùstùs 2023 di e Direktor General Suplente di ‘VNG’ na Minister di BPD pa solushoná e pagonan di kontribushon atrasá for di 2011 di pais Kòrsou.
Esaki ta basá riba e proposishon di 16 di novèmber 2023 di Minister suplente di BPD, teniendo kuenta ku e konseho di 2 di òktober 2023 di e Direktor di sektor pa Maneho Finansiero i Maneho di Presupuesto. Konseho di Minister ta bai di akuerdo pa ofresé e lei den konsepto na Gobernadó pa firma.
4. Petishon pa akuerdo di gestion entre Kòrsou i Excel in Sports Foundation (Minister di Enseñansa, Siensia, Kultura i Deporte)
Konseho di Minister a bai di akuerdo ku e siguiente desishonnan:
1. Ta bai di akuerdo ku kontenido di e konsepto agregá di e akuerdo di gestion. E akuerdo akí lo regla e maneho, mantenshon i uso di tereno den Suffisant pa aktividatnan deportivo i di rekreashon, den kooperashon ku Excel in Sports Foundation.
2. Ta duna pèrmit na Minister di Enseñansa, Siensia, Kultura i Deporte (OWCS) pa huntu ku Minister di Tráfiko, Transporte i Planifikashon Urbano (VVRP), firma e maneho di gestion den konsepto.
Esaki konforme e petishon di 15 di novèmber 2023 di Minister di OWCS. Konseho di Minister ta bai di akuerdo tambe pa ofresé e lei di konsepto athunto na Gobernadó pa firma.
5. Petishon pa akuerdo di gestion entre Kòrsou i Fundashon Jeugd Baseball Organisatie Sta. Rosa (SYBORG) (Minister di Enseñansa, Siensia, Kulura i Deporte)
Konseho di Minister ta bai di akuerdo ku e siguiente desishonnan:
1. Ta bai di akuerdo ku kontenido di e konsepto agregá di e akuerdo di gestion. E akuerdo akí lo regla e maneho, mantenshon i uso di tereno na Sta. Rosa pa aktividatnan deportivo i di rekreashon, den kooperashon ku Fundashon Jeugd Baseball Organisatie Sta. Rosa (SYBORG).
2. Ta duna pèrmit na Minister di Enseñansa, Siensia, Kultura i Deporte (OWCS) pa huntu ku Minister di Tráfiko, Transporte i Planifikashon Urbano (VVRP), firma e maneho di gestion den konsepto.
Esaki konforme e petishon di 15 di novèmber 2023 di Minister di OWCS. Konseho di Minister ta bai di akuerdo tambe pa ofresé e lei den konsepto athunto na Gobernadó pa firma.
6. Petishon pa konsepto di akuerdo “Amendment No.1 to Contract NO.22-SB6280’ ku Expertise France pa proyekto Klein Kòrsou (Minister di Asuntunan General)
Konseho di Minister ta bai di akuerdo ku e siguiente desishonnan:
1. Ta bai di akuerdo ku loke tin pará den konsepto di e akuerdo athunto “Amendment No.1 to Contract NO.22-SB6280’ pa proyekto Klein Kòrsou ku Expertise France.
2. Ta duna pèrmit na Direktor di Maneho di Minister di Salubridat, Medio Ambiente i Naturalesa (GMN) pa firma e konsepto di akuerdo na nòmber di Kòrsou.
Esaki konforme e petishon di 30 di òktober 2023 di Minister Suplente di Asuntunan General. Konseho di Minister ta bai di akuerdo tambe pa ofresé e lei den konsepto na Gobernadó pa firma.
7. Konseho tokante modifikashonnan ‘Ontwerpbegroting 2024’ (Minister di Finansa)
Konseho di Minister ta bai di akuerdo ku e siguiente desishonnan.
1. Ta manda e nota den konsepto di modifikashonnan hasí na e ‘Ontwerpbegroting 2024’ pa Gobernadó, ku mas despues lo presentá esaki na Hunta di Konseho pa nan konseho.
2. Lo manda e mesun nota den konsepto di modifikashonnan, via Minister di Finansa, na Kolegio supervishon finansiero (Cft) pa konseho.
Esaki ta konforme e konseho di 20 di novèmber 2023 di Direktor di Sektor di Maneho Finansiero i Maneho di Presupuesto.
