Publiká riba 17 Yanüari 2024
Willemstad- Resientemente Sr. Raoul Behr a keda nombrá Presidente di e Hunta di Kámara di Komèrsio (KVK). Den e kuadro aki, Minister di Desaroyo Ekonómiko, sr. Ruisandro Cijntje ta felisitá e presidente nobo i alabes ta gradisí eks presidente sr. William (Billy) Jonkheer pa tur e añanan ku ela fungi komo presidente di e organisashon aki. Kámara di Komèrsio pa mas di 140 aña a hunga un papel importante den desaroyo komersial na Kòrsou i ku e nombramentu di sr. Behr komo presidente nobo nan ta mustra ehempel kon ta garantisá kontinuidat dor di traha riba relevo pa sigui ku e aktividatnan di e organisashon.
Minister Cijntje tin un mira positivo riba lasonan
di kolaborashon fuerte ku KvK. Pronto lo lansa den estrecho kolaborashon ku KVK, e MiNEGOSHI Shared & Support Services pa stimulá i fortifiká desaroyo di empresarionan mikro, chikí i mediano. Tambe nos ta kanando un proseso pa digitalisá e servisionan di registro di empresa i servisionan relatá na esaki pa medio di “Landspakket”. E trayekto aki lo kondusí na mihó servisio, mas rápido i tambe mas data i informashon pa por traha maneho mas dirigí.
Minister Cijntje ta ekspresá apresio pa e tempu ku e por a traha huntu ku sr. Jonkheer komo presidente di KVK. Tabata un periodo di kolaborashon ameno kaminda na tur momento por a konta ku sr. Jonkheer pa traha huntu na benefisio di Kòrsou su komersio i industria. Minister Cijntje ta deseá sr. Jonkheer tur klase di éksito den e etapa nobo akí i depaso ta duna un kaluroso bon bini na e presidente entrante di KVK kende ta sr. Raoul Behr i ta konta ku e mesun disponibilidat pa huntu logra desaroyo i kresementu di ekonomia di Kòrsou.