Publiká riba 21 Yanüari 2024
Willemstad – Archivo Nashonal di Kòrsou ta habri aña ku un charla interesantísimo tokante registro di nos antepasadonan. Dia 29 di yanüari 2024 historiadora Margo Groenewoud PhD i Gyoni Jamanika studiante di “culturele wetenschappen” na Universidat Radboud lo elaborá riba e tópiko aki.
Investigashon riba nos antepasadonan na Kòrsou i den Karibe no ta imposibel, pero semper esaki a eksigí hopi di e investigadó. Afortunadamente, tin esfuersonan hasí pa hasi fuentenan mas disponibel. Archivo Nashonal di Kòrsou aktualmente ta forma parti di e ‘Base di Datos (‘Database’) Históriko di Sürnam i Karibe’, huntu ku otro archivonan na Sürnam i Aruba, i ku e tim di proyekto di Universidad Radboud na Nijmegen. E promé logro grandi ku a ser realisá ta pa hasi e registronan di sklabitut aksesible ‘Online’. Dia 29 di yanüari 2024 tin un charla tokante desaroyonan nobo den investigashon di famia Karibense. Bo ta kordialmente invitá na Archivo Nashonal di Kòrsou na Scharlooweg 77-79 pa 7 or di anochi. E charla lo wòrdu presentá pa sra. Margo Groenewoud PhD i Gyoni Jamanika, studiante di siensianan Kultural Universal na Universidad Radboud. Nan lo papia tokante e desaroyonan aktual i futuro di e proyekto. Kon esaki ta importante pa komunidat i investigadónan, i kon kada un por aportá. Despues di e charla lo tin espasio pa hasi pregunta i papia ku esnan involukrá ku e proyekto.
Favor di registrá via: nationaal.archief@gobiernu.cw komo ku asientonan ta limitá.
