Publiká riba 20 Febrüari 2024
Willemstad – E temporada di Karnaval 2024 a finalisá i e Tim di Prekario por mira bèk riba un período di preparashon ku a kana konformé planifikashon. E aña aki ta speshal debí na e registrashon kompletamente digital i midimentu nobo di parsela di prekario. Esaki ta un echo ku ta marka historia pa nos evento kultural di Karnaval.
E periodo di registrashon pa klientenan eksistente di prekario i klientenan nobo ku kier a bini na remarke pa optené un tereno di prekario a inisiá dia 20 di novèmber 2023 i a klousurá dia 15 di desèmber 2023. Durante e periodo aki, klientenan por a registrá nan mes i paga pa e derechi di uso di e kavelnan durante Karnaval 2024. Mirando ku klientenan a indiká ku e periodo ta kòrtiku a alargá esaki ku 2 siman mas i a terminá 29 desèmber 2023
E aña aki, Tim di Prekario a atministrá 1.381 kavel. Aserka tabatin mas ku 90 kavel parselá pa benta di kuminda i bebida ku nos ta yama ‘Stand’. Tambe tin ku menshoná ku:
82 parsela a bini liber mirando ku a kuminsá midi tur parsela di forma eksakto,
tabatin 78 parsela ku no por a keda identifiká pa periodo di Karnaval 2024,
a registrá 11 dispensashon.
Tim di Prekario tin ku informá tambe ku e personanan ku a paga nan parsela, ounke ku nan tabatin dispensashon registrá, pronto nan lo risibí nan sèn bek.
Prekario a risibí un kantidat di 464 petishon ku a wòrdu asigná riba e lista di espera. Di esakinan, a otorgá 9 persona, riba lista di espera, nan pèrmit pa prekario karnaval.
Tim di Prekario a risibí via yamada, whats-app, i via di inspektornan riba kaya, un total di mas o ménos 100 ‘melding’. Di e ‘melding’ aki, na momentu ku a parselá, 5% di e total di kavelnan, e tim a duna 1 meter di ménos, i a hasi korekshon pa e siguiente periodo di Karnaval e kliente tin su meter ku e ta paga p’e.
Tambe na momentu ku a diseñá e mapa, e tim a enkontra algun desafio pa ku kambio den e infrastruktura. Esaki a resultá ku tabatin diferente kavel, mas o ménos un 7% di e kavel, ku a ser posishoná den un palu di lus, òf un bòrchi, òf un bòrchi di bùs. Esaki tambe ta ser koregí pa e siguiente periodo di karnaval.
Tim di Prekario a enkontra ku 10 situashon di problema, ku a ser resolvé i ku pa e próksimo periodo di Karnaval lo no ta eksistente.
E proseso digital a resultá den un maneho mas efisiente i a duna oportunidat pa midi tur parsela ku presishon, loke a resultá den un mihó maneho di e base di dato di Prekario. E Tim di Prekario a kontra algun desafio, pero ku e ekspertonan asigná a sa di resolvé e partinan aki na momentu ku klientenan a bai kuminsá traha pa pone sea stelazje, banki òf trailer.
Na final di e periodo, Tim Prekario ta informá ku 5 persona a pèrdè nan pèrmit di Prekario debí ku nan no a limpia nan parsela na tempu, i tin 3 kaso ku ta investigando si e sushi ta di e kliente di e parsela.
Tim di Prekario ta informá tambe ku a tuma nota di hopi sushi di palèt ku a poné ku, en bes di 1 dia pa limpia e ruta ku ayudo di Selikor, mester a pone 2 dia pa limpia e ruta di Karnaval.
Tim di prekario ta hasi un yamada na kada persona di tereno priva ku ainda tin un stelazje harmá den nan kura pa porfabor desmantelá esaki òf pa demostrá ku e persona tin un pèrmit di konstrukshon pa esaki por keda den e kura.
E Tim di Prekario ta konsistí di un lider di tim, inspektornan i supervisornan, i personal komunikashon, atministrativo i di maneho pa yuda e tim di Prekario. Nan dedikashon a resultá den un preparashon eksitoso pa Karnaval 2024.
