Publiká riba 19 Mart 2024
Komo ku teknologia ta influensiá enseñansa, ta importante pa maestro- i dosentenan keda na altura di desaroyonan digital ku ta promové un enseñansa moderno den e era di siglo 21. Finlandia ta un di e paisnan mas moderno kaminda digitalisashon a drenta den e sistema di enseñansa i e alfabetisashon digital ta ampliamente usá. For di sistema di dominá métodonan di enseñansa digital i inovativo te ku hasi mihó uso di e potensial teknológiko edukativo, tur esakinan ta forma parti integral di e abilidatnan nesesario pa e maestro- i dosentenan na Finlandia. P’esei un tim di maestro di Direktiva di Skolnan Públiko di Kòrsou ta sali pa Finlandia pa sera konosí mas di aserka ku e sistema edukativo akí.
E trayekto akí ta forma parti di un trayekto kaminda Servisio di Skolnan Públiko ta traha huntu ku e organisashon di Erasmusplus pa promové e práktika i dunamentu di lès den enseñansa i ta finansiá pa e proyekto di Erasmusplus. A traves di esaki ta hasi interkambio di konosementu i asina ta haña mas konosementu i informashon profeshonal den e kuadro inovativo. Tambe e inisiativa di interkambio akí ta stimulá e maestro pa sigui krese i kana den un direkshon positivo pa asina eduká i duna enseñansa di forma moderno ku ta kuadra ku hèrmèntnan di siglo 21.
Mas informashon di e trayekto akí lo ta publiká durante e periodo akí riba wèpsait di gobièrnu i página di facebook di Ministerio di Enseñansa, Siensia, Kultura i Deporte. A la bes por sigui e página di Facebook di Skol di Fundeshi Kolegio Elis Juliana-Sheila Karel pa mas informashon.
Minister di ESKD sr. Sithree van Heydoorn ta sumamente kontentu ku e trayekto akí i ta sigui motivá mas skol pa hasi uso di e oportunidat ku e proyekto Erasmusplus ta brinda na nos skolnan.
—
KOMUNIKASHON
**Riba potrètnan athunto por tuma nota di e reunion informativo kaminda e grupo a kòmbersá ku Direktor di Servisio di Skolnan Públiko.
