Publiká riba 28 Mart 2024
Willemstad – Durante e reunion di Komité di Orkan ku a tuma lugá na na siudat di Panama, Profesor Scott Glenn di Rutgers University Center for Ocean Observing Leadership, a anunsiá ku den koperashon ku Servisio Meteorológiko di Kòrsou un robòt di laman lo bai eksplorá laman Karibe saliendo for di Puerto Rico pa Kòrsou.
Ku kresementu di e impakto di kambio di klima a bira nesesario i vital pa hasi opservashon, investigashon i servisionan di oseano.
Den e kuadro aki, Nashonnan Uní a deklará e dékada aki (2021-2030) komo Dékada di Siensia di Oséano pa desaroyo sostenibel. Esaki ku e meta pa apoyá tur strategianan pa stimulá siensia di oseano den forma inovativo i transformativo. Den nos region ora ta elaborá aserka di komienso, trayekto i intensifikason (rápido) di orkan, ta sumamente importante pa inkluí mas parameternan di laman.
Ta bon pa por tin bon konosementu di entre otro kantidat di kalor di laman na nivel mas profundo, konsentrashon di salu, i den kua forma e laman ta meskla. E informashonnan aki lo por kontribuí na un pronóstiko mas eksakto di e trayekto i intensidat di orkannan ku lo yuda e servisio meteorológiko den su trabou di alertá komunidat.
Den e próksimo lunanan lo kuminsá ku e preparashonnan p’e proyekto importante aki pa Karibe kaminda e sientífikonan di Rutgers University , Ocean Glider Laboratory di Virgin Island lo ta di bishita na Servisio Meteorológiko pa kordiná e proyekto.
Minister Cooper ta kontentu ku e bon notisia aki, i sigur lo sigui apoyá tur trabou i investigashon ku por halsa e servisio di nos Servisio Meteorológiko relashoná ku wer severo i kambio di klima. Asina nos por duna mihó servisio na komunidat komo gobièrnu.
E proyekto aki ta wòrdu finansiá dor di G. Unger Vetlesen Foundation ku ta sostené investigashon riba tereno di klima, wer, ekoisistema i desaroyo di kapasidat den Karibe.
Universidat di Kòrsou lo por risibí e oportunidat pa kolaborá den e estudio aki.
Riba potrèt: Profesor Scott Glenn di Rutgers University Center for Ocean Observing Leadership felisitando dr Albert Martis, Direktor di Servisio Meteorológiko Kòrsou.
