Publiká riba 30 Mart 2024
Willemstad – For di inisio di su periodo, e aktual Minister di Finansa a inisiá i/òf kontinuá varios trayekto di reorganisashon den henter e servisio di impuesto. Por ehèmpel un Ontvanger “sin kèsh”, introdukshon di un departamento di servisio na kliente ku un ‘callcenter’, i implementashon i publikashon di un politika transparente di kobransa.
Ademas, e minister di Finansa a pidi SOAB pa periódikamente kontrolá e aplikashon korekto di e politika di kobransa. Ta importante pa menshoná ku SOAB no a hasi niun investigashon riba niun persona spesífiko den Ontvanger, pues e investigashonnan di SOAB no tabata dirigí riba e akshonnan òf neglishensia di un persona spesifiko na Ontvanger.
SOAB a kontrolá e proseso di kobransa di impuesto i e aplikashon korekto di e politika di kobransa na nivel organisashonal. Despues, SOAB a raportá lokual nan a konstatá i su rekomendashonnan.
SOAB no a hasi un asina yamá “controleonderzoek” (investigashon di kòntròl). Konsekuensha di esaki ta ku SOAB no por inkluí konklushonnan den su raportnan.
Sinembargo, lokual ku SOAB a konstatá i raportá ta di tal indole ku esakinan a kondusí na un kantidat di akshonnan di mehoransa, entre nan:
• E desishon di e hefe di Ontvanger ku no lo paga adelanto (voorschotten) mas. E desishon aki a drenta na vigor 1 di yanüari 2024;
• E desishon ku imediatamente un plan di mehoransa mester wòrdú prepará i implementá pa asina mitigá e riesgonan ku SOAB a señalá. SOAB lo evaluá e plan di mehoransa, monitoriá e implementashon, i raportá tokante esaki;
• E desishon ku kualkier adelanto ku ainda no a wòrdú kanselá, mester wòrdú pagá lo mas pronto posibel;
• E desishon ku den tur archivo (‘dossier’) di debenan di impuesto mester tin e dokumentashon nesesario (inkluso e hustifikashon di akuerdonan di pago);
• E desishon ku e kòntròlnan interno di SOAB lo kontinuá i intensifiká;
• E desishon ku mester bin un sentro di notifikashon (‘meldpunt’) pa ámtenarnan i/òf kontribuyentenan (personanan ku ta paga impuesto);
• E desishon ku mester bin un kampaña di informashon pa informá komunidat tokante e politika i guia di kobransa pa asina tur hende ta na áltura di nan derecho- i debernan.
E akshonnan di mehoransa menshoná tin komo meta pa mitigá e riesgonan ku SOAB a señalá i pa optimalisá e funshonamentu di Ontvanger. Nos ta sigui traha riba mehoransa di nos servisio di impuesto (Inspekshon i Ontvanger) a fin di ofresé un servisio transparente i amigabel na nos pueblo.
Minister di Finansa a.i.
Ing. C.F. Cooper MSc
