Publiká riba 10 Aprel 2024
Mientrastantu ta trahando riba diversifikashon di nos ekonomia
Willemstad – Ku hopi orguyo i gran satisfakshon, Minister di Desaroyo Ekonómiko, Ruisandro Cijntje ta anunsiá un biaha mas ku sifranan preliminar for di e publikashon di Banko Sentral di Kòrsou i St. Maarten, Economic Bulletin, March 2024, ta mustra ku e sektor di turismo ta e motor prinsipal tras di desaroyo ekonómiko den 2023 i tambe 2024. Minister Cijntje su maneho den e último dos añanan tabata dirigí riba e sektor di 
turismo kual ta e sektor ku mas lihé lo por a kontribuí na un kresementu ekonómiko. E resultado di e esfuerso aki nos ta mira awe den un pronóstiko di kresementu ekonómiko ku a surpasá e nivel di pre-covid. E kresementu ekonómiko último aña a konsentrá riba atraé aerolínea nan nobo manera Azul for di Brasil, Corendon Airlines for di Amsterdam, Delta Airlines for di Atlanta, i United Airlines for di New Jersey. Tambe oumento di frekuensia di esunnan eksistente manera Air Canada, Jet Blue, Copa Airlines i Avianca. Tambe invershon den e sektor hotelero a kontribuí na kresementu di e sektor turístiko. Konstrukshonnan manera Corendon, Kurá Botanica, Harbor Hotel, One Mambo Beach, Pyrmont, The Ridge, Dolphin Suites, Marriott Courtyard i Bed & Bike na Westpunt ta algun di e invershonnan ku a kontribuí na e kresementu. Minister Ruisandro Cijntje, ta sigui traha huntu ku stakeholdernan den e sektor di Turismo pa atraé airlift adishonal, stimulá desaroyo di hotèlnan nobo, diversifikashon di e merkado di turismo ku ta gasta mas tantu, i mehorashon di e produkto turístiko. Pa loke ta trata barkunan krusero diferente a bishitá Kòrsou pa promé biaha, manera entre otro Carnival Celebration i Harmony of the Seas. E popularidat di Kòrsou komo destinashon turístiko a trese kuné un kantidat supstansial di turista.
Manera ta konosí, e sektor di turismo su kontribushon na e kantidat total di divisa ta mas òf ménos 45%. Turismo komo sektor ta forma alrededor di 30% di nos GDP. Esaki ta trese kuné ku ainda e sektor tin e potensial pa sigui krese aun mas i tin espasio pa sigui diversifiká e sektor di turismo si mira ku den mayoria isla den region e kontribushon di turismo komo porsentahe di GDP ta mas haltu. Minister Cijntje ta hopi konsiente di e ‘life cycle’ di e sektor di turismo i e fenómenonan ku evolushon di e sektor ta trese kuné. Aktualmente, Kòrsou kompará ku otro ekonomianan den region ta den e fase di kresementu. Na novèmber 2023 a selebrá e logro históriko ku riba mei mion turista di estadia a bishitá Kòrsou. E ophetivo pa e aña 2024 aki ta di trese alrededor di 670 mil turista di estadia na Kòrsou. Den kuadro di esaki, huntu ku Ministerio di Desaroyo Ekonómiko i CTB, Minister Cijntje ta preparando algun konferensia ku lo hiba na e konferensia prinsipal, na okashon di selebrashon di Dia Mundial di Turismo, ku ta 27 di sèptèmber próksimo. Durante e konferensianan promé ku dia 27 sèptèmber próksimo, Minister lo dirigí riba e diferente fenómenonan ku e kresementu di e sektor ta trese kuné i e maneho ku tin ku bai hiba teniendo kuenta ku e retonan ku ta premirá banda di e desaroyo di e sektor.
Pa por pèrkurá ku nos kresementu ekonómiko ta diversifiká i resiliente Minister Cijntje huntu ku e ministerio ta implementando e Strategia di Eksportashon Nashonal. Den e strategia aki e énfasis ta poné riba 7 sektor di eksportashon ku ta Medical and Wellness Tourism, IT, Servisionan marítimo, Servisionan finansiero internashonal, Industria Kreativo, Edukashon i Blue bioeconomy. Ademas di esaki, den e proseso di transishon di energia ta trahando konhuntamente ku Hulanda pa realisá un ekonomia klimatikamente neutral i banda di esaki nos ta ehekutando un plan pa seguridat alimentisio.
Den e afan pa sigui diversifiká Kòrsou su ekonomia, a firma un MOU ku e grupo Proteus Ocean Group pa konstrukshon di e promé laboratorio di investigashon marítimo bou di awa. Tambe tin un inisiativa lokal pa traha un sea aquarium bou di awa ku ta un balor agregá na e produkto turístiko ku ta sirbi pa promové e sektor di turismo.
Na mes momentu, Minister Cijntje i su ministerio i stakeholdernan envolví ta dedikando tur esfuerso pa desaroyá un plan ekonómiko riba término largu pa garantisá desaroyo duradero. Minister Cijntje a bin ta traha ku hopi dedikashon i koutela riba e plan ekonómiko di término largu na nivel nashonal, pa rekuperá Kòrsou su ekonomia saliendo for di e konsepto di Banko Mundial, pa garantisá desaroyo duradero (bèrdè), resiliente i inklusivo. E plan den desaroyo, ta duna un kuadro di maneho pa fortifiká e base di maneho, invertí den i restrukturá Kòrsou su ekonomia. Pues, e plan ta duna rekomendashonnan konkreto pa gana bèk lokual a pèrdè durante añanan. E plan ta trata tur área di maneho ku ta determinante pa kresementu ekonómiko duradero. Di akuerdo ku Minister Cijntje, ta importante pa nos realisá komo pais ku kresementu duradero ta regardá tur e áreanan di maneho. Esaki ta un aserkamentu ku pa añanan a bin ta purba pa realisá, sigur mirando ku durante tempu por a tuma nota ku ta traha den isolashon. Si keda hasi meskos no por ferwagt resultado diferente. P’esei, Minister Cijntje a opta pa un aserkamentu diferente, pa por realisá berdaderamente e kambio ku nos tur ta deseá.
E desaroyo ekonómiko positivo pa Kòrsou den e último 3 añanan ku ta tras di lomba i lokual ta premirá den 2024, ta resultado di e maneho ekonómiko di término kòrtiku ku Minister Ruisandro Cijntje a bin ta hiba. Apesar di e kaida fuerte di Kòrsou su ekonomia en general i prinsipalmente e sektor di turismo i su provedornan spesífikamente durante pandemia, e maneho ekonómiko di Minister Cijntje pa dirigí agresivamente i prinsipalmente riba stimulashon di sektor di turismo a resultá benefisioso pa Kòrsou su ekonomia. “Esaki ta netamente lokual e maneho tabata dirigí riba dje, esta pa analisá i determiná e ‘low hanging fruits’ pa rekuperá e nivel di kresementu ekonómiko mas pronto posibel. Por nota ku esaki a bai “man den man” ku rekuperashon di kuponan di trabou ku a bai pèrdí i paralelo na esaki a krea kuponan di trabou nobo komo konsekuensia di invershonnan nobo den e sektor”segun Minister Cijntje.
Huntu nos ta logra ku Kòrsou su ekonomia ta sigui krese manera el a bin ta desaroyá den e último añanan. Manera indiká pa CBCS, ta ferwagt ku pa aña 2024 Kòrsou su ekonomia lo sigui krese na bienestar di un i tur.
